Read Lamkang 1. Коринтјаните 3 Bible Online

1. Коринтјаните 3 - Lamkang bible

1. Коринтјаните 3

¹Јас, браќа, не можев да ви зборувам како на духовни, туку како на телесни, како на младенци во Христа.

²Со млеко ве напоив, а не со јадење, оти уште не можевте да го примите, а и сега уште не можете,

³бидејќи уште сте телесни. И навистина, штом помеѓу вас има завист, кавга и неслога, не сте ли телесни и не живеете ли како обични луѓе?

⁴Оти, кога еден зборува: »Јас сум Павлов«, а друг: »Јас сум Аполосов«, не сте ли телесни?

⁵Кој е, пак, Павле, а кој Аполос? Не се ли тие слуги, преку кои вие поверувавте, и тоа според она, колку кому Господ му дал?

⁶Јас посадив, Аполос поли, но Бог направи да израсте.

⁷Затоа, ниту оној, кој сади, е нешто, ниту, пак, оној, што полива, а сѐ е Бог, Кој прави да израсте.

⁸Кој сади и кој полива се еднакви; но секој ќе ја добие својата награда според својот труд.

⁹Ние сме Му соработници на Бога, а вие сте Божја нива, Божја зграда.

¹⁰Според дадената ми од Бога благодат, јас, како мудар првоградител, поставив темел, а друг ѕида; само секој нека пази како ѕида.

¹¹Зашто никој не може да постави друга основа, освен положената, која е Исус Христос.

¹²Ако некој ѕида врз таа основа со злато, сребро, драгоцени камења, дрва, сено или слама,

¹³делото на секого ќе стане јавно; судниот ден ќе го покаже; зашто преку оган ќе се открие, и огнот ќе испита, какво е делото на секого.

¹⁴И, ако делото, на оној што ѕидал, се задржи, тој ќе прими награда.

¹⁵А чие дело изгори, тој ќе биде оштетен, а сам ќе се спаси, но така — како преку оган.

¹⁶Не знаете ли вие дека сте храм Божји, и Духот Божји живее во вас?

¹⁷Ако некој го разори Божјиот храм, него Бог ќе го разори; зашто Божјиот храм е свет, а тоа сте вие.

¹⁸Никој нека не се лаже; ако некој од вас мисли дека е мудар во овој свет, нека стане безумен, за да биде мудар.

¹⁹Зашто мудроста од овој свет е безумство пред Бога, како што е напишано: »Он ги фаќа мудрите во нивното лукавство.«

²⁰И пак: »Господ знае дека помислите на мудрите се суетни.«

²¹И така, никој нека не се фали со луѓе, бидејќи сѐ е ваше:

²²било Павле или Аполос, или Кифа, било светот или животот, или смртта, било сегашното или идното, — сѐ е ваше;

²³вие, пак, сте Христови, а Христос — Божји.