Read Lamkang 1. Коринтјаните 7 Bible Online

1. Коринтјаните 7 - Lamkang bible

1. Коринтјаните 7

¹А за она што ми пишавте — добро е човек да не се допира до жена.

²Но, за да се избегне блудството, секој нека си има своја жена, и секоја жена свој маж.

³Мажот да ја има спрема жената својата должна љубов, а исто така и жената — спрема мажот.

⁴Жената не е господарка на телото свое, туку мажот; исто така и мажот не е господар на телото свое, туку жената.

⁵Не одделувајте се еден од друг — освен по договор за некое време, за да постите и да Му се молите на Бога; и пак состанете се за да не ве искуша сатаната, поради вашето невоздржување.

⁶Ова, пак, ви го велам како совет, а не како заповед.

⁷Оти сакам, сите луѓе да се како јас; но секој си има свој дар од Бога — еден ваков, друг инаков.

⁸А на неженетите и на вдовиците им велам: добро ќе им биде, ако останат како јас.

⁹Но, ако не можат да се воздржат, нека се женат и мажат; бидејќи подобро е да се женат и мажат, отколку да се возбудуваат.

¹⁰А на женетите и мажените им заповедам — не јас, туку Господ — жената да не се разделува од мажот, —

¹¹ако, пак, и се раздели, нека не се премажува, или, пак, да се помири со мажот свој, — а и мажот да не ја остава жената своја.

¹²А на другите им зборувам јас, а не Господ: ако некој од браќата има жена, која не поверувала, и таа е согласна да живее со него, нека не ја остава;

¹³и ако некоја жена има маж, кој не поверувал, а тој е согласен да живее со неа, таа да не го остава.

¹⁴Зашто маж што не поверувал се осветува преку жената која верува, и жена што не поверувала се осветува преку мажот, кој верува; инаку децата ваши би биле нечисти, а сега се свети.

¹⁵Ако некој, што не верувал, сака да се разведе, нека се разведе; во такви случаи братот или сестрата не се заробени; зашто за мир нѐ повикал Бог.

¹⁶Оти, од каде знаеш, жено, не ќе ли го спасиш ти мажот? Или од каде знаеш, о мажу, нема ли да ја спасиш ти жената?

¹⁷Само секој нека постапува така, како што му определил Бог, како го повикал Господ. Така заповедам по сите цркви.

¹⁸Обрезан ли е повикан некој, нека не крие; необрезан ли е повикан некој, нека не се обрезува.

¹⁹Обрезанието е ништо, и необрезанието е ништо, а пазењето на Божјите заповеди е сѐ.

²⁰Секој да си остане во звањето, во кое е повикан.

²¹Роб ли си призван, да немаш грижа; но, дури и ако можеш да станеш слободен, уште повеќе ползувај се од ропството.

²²Оти повиканиот во Господа роб, станува Господов слободен; исто така и повиканиот слободен станува роб Христов.

²³Вие сте скапо платени: не станувајте робови на луѓе.

²⁴Секој, во какво призвание е повикан, браќа, во него нека остане и пред Бога.

²⁵А, што се однесува до девојките, за нив немам заповед од Господа, но советувам; како што сум помилуван од Господа, да Му бидам верен.

²⁶Поради сегашната потреба го наоѓам за добро ова: добро е за човекот да биде таков.

²⁷Сврзан ли си со жена, не барај развод; разврзан ли си од жена, не барај жена.

²⁸Но, ако се ожениш, нема да згрешиш; и девојка, ако се омажи, нема да згреши. Но таквите ќе имаат телесни неволи, а јас, пак, ве штедам.

²⁹Ова ви го велам, браќа, оти времето натаму е кратко, та оние, што имаат жена, да бидат како да ја немаат;

³⁰и кои плачат — како да не плачат; и кои се радуваат — како да не се радуваат; и кои купуваат — како да немаат,

³¹и кои се ползуваат од овој свет — како да не се ползуваат; зашто се менува обликот на овој свет.

³²Јас, пак, сакам вие да бидете без грижи. Неженетиот се грижи за Господови работи, — како да Му угоди на Господа;

³³а женетиот се грижи за световни работи — како да ѝ угоди на жената.

³⁴Постои разлика меѓу жена и девојка; неомажената се грижи за Господови работи — како да Му угоди на Господа, за да стане света со телото и со духот; а омажената се грижи за световни работи — како да му угоди на мажот свој.

³⁵Ова ви го зборувам за ваша корист, не да ви поставам замка, туку за убава и пристојна служба на Господа без пречки.

³⁶Ако некој мисли дека е срамно девојката негова да му остане така во напредната возраст, тој нека прави како сака; нема да погреши; таквите нека се мажат.

³⁷А кој е тврд во срцето свое, и нема потреба, а има власт над својата волја, па реши во срцето свое да ја пази својата девојка, тој добро прави.

³⁸Но и оној, кој ја омажува својата девојка, добро прави; а оној, што не ја мажи, подобро прави.

³⁹Жената е сврзана преку Законот, додека е жив мажот нејзин; а ако умре мажот нејзин, таа е слободна да се премажи за кого сака, но само во името на Господа.

⁴⁰Само, поблажена е, ако си остане така, според моето мислење; а мислам дека и јас имам Дух Божји.