Read Lamkang 2. Коринтјаните 2 Bible Online

2. Коринтјаните 2 - Lamkang bible

2. Коринтјаните 2

¹И така, решив во себеси да не доаѓам при вас со жалост,

²зашто, ако јас ве нажалам, тогаш кој ќе ме зарадува, ако не оној, кого сум го ожалостил?

³Тоа исто и ви го напишав, та, кога ќе дојдам, да не ме огорчат оние, кои треба да ме зарадуваат; бидејќи сум уверен во сите вас дека мојата радост е радост и за сите вас.

⁴Оти од многу грижи и од тага на срцето ви напишав со многу солзи, не за да ве огорчам, туку за да ја познаете преголемата љубов, што ја имам кон вас.

⁵Ако ли, пак, некој ме ожалости, тоа не ме ожалостил мене, а донекаде, да не претерам, сите вас.

⁶Оти доволна казна е ова за таков од мнозинството;

⁷така што за вас е подобро да му простите и да го утешите, за да не пропадне од преголема жалост;

⁸затоа ве молам кон него да покажете љубов.

⁹Зашто со таква цел и ви напишав, со обид да узнаам дали сте во сѐ послушни.

¹⁰А кому вие ќе му простите за нешто, нему ќе му опростам и јас; оти јас, ако сум простил некому нешто, сум му простил поради вас во името на Исуса Христа,

¹¹за да не земе сатаната предимство над нас: бидејќи неговите замисли ни се извесни.

¹²Кога дојдов во Троада да го проповедам Евангелието Христово, и вратата ми беше отворена во името Господово,

¹³духот мој немаше спокој, бидејќи таму не го најдов мојот брат Тит; и откако се простив од нив, заминав за Македонија.

¹⁴Но да Му благодариме на Бога, Кој секогаш ни дава победа во Исуса Христа, и преку нас го шири мирисот насекаде, по кој Го познаваме самиот Него.

¹⁵Зашто ние сме Христов мирис пред Бога за оние, кои се спасуваат, и за оние, кои гинат;

¹⁶на едните сме смртоносен мирис за смрт, а на другите животворен мирис за живот. И за ова кој е способен?

¹⁷Оти ние не го изопачуваме словото Божјо, како мнозина, а го проповедаме искрено, како од Бога, пред Бога, во Христа.