Read Lamkang 2. Коринтјаните 5 Bible Online

2. Коринтјаните 5 - Lamkang bible

2. Коринтјаните 5

¹Знаеме дека, кога земното живеалиште на нашето тело, кое е како шатор, се разруши, тогаш имаме од Бога дом, куќа неракотворна, вечно живеалиште на небесата.

²Затоа и воздишуваме, копнеејќи да се облечеме во своето небесно живеалиште;

³само, да не би и облечени, да се најдеме голи.

⁴Оти, ние кои се наоѓаме во овој шатор, воздишуваме обременети; бидејќи не сакаме да се соблечеме, туку да се преоблечеме, та животот да го проголта смртното.

⁵А Бог, Кој нѐ создаде токму за ова, ни даде и залог на Духот.

⁶И така, секогаш сме спокојни, зашто знаеме дека, додека живееме во телото, ние се оддалечуваме од Господа,

⁷бидејќи според верата живееме, а не според гледањето.

⁸Но не се плашиме и сакаме што поскоро да го напуштиме телото и да се прибереме при Господа.

⁹Па затоа и усрдно се грижиме да Му бидеме угодни, било кога живееме во телото, било кога го напуштаме;

¹⁰зашто сите ние треба да се јавиме пред Христовиот суд. Та секој да прими што заслужил, според она што го извршил во телото свое, било добро или зло.

¹¹И така, знаејќи го стравот од Господа, ние ги вразумуваме луѓето, а за Бога сме јавни: се надеваме дека сме познати и на вашите совести.

¹²Не се фалиме, пак, пред вас, туку ви даваме повод, вие да се фалите со нас, та да има, што да им речете на оние, кои се фалат по лице, а не по срце.

¹³Ако сме претерале во пофалбите свои, тоа е заради Бога; ако сме умерени, тоа е поради вас.

¹⁴Бидејќи љубовта Христова нѐ гони да размислуваме за ова дека, кога еден умрел за сите, тогаш сите се умрени.

¹⁵А Христос умре за сите, та живите да живеат не веќе за себеси, а за Оној, Кој умре за нив и воскресна.

¹⁶Затоа ние отсега никого не познаваме по тело; иако Христа Го познаваме по телото, но сега веќе не Го познаваме.

¹⁷И така, кој е во Христа, тој е ново создание; старото помина; ете, сѐ стана ново.

¹⁸А сѐ е од Бога, Кој нѐ измири со Себе преку Исуса Христа и ни го даде служењето на тоа измирување.

¹⁹Оти Бог го измири светот со Себе преку Христа, не земајќи ги предвид гревовите на луѓето, и го вложи во нас словото на измирување.

²⁰Па така, ние сме пратеници место Христа, како Бог да зборува преку нас. Ве молиме во името на Христа: помирете се со Бога!

²¹Зашто Оној, Кој не знаеше грев, Он место нас Го направи грев, та преку Него да станеме правда Божја.