Read Lamkang Ефесјаните 2 Bible Online

Ефесјаните 2 - Lamkang bible

Ефесјаните 2

¹И вас, кои бевте мртви поради вашите престапи и гревови,

²во кои живеевте некогаш според животот на овој свет, согласно со кнезот на воздухот, односно на духот, кој сега дејствува во синовите на неверието,

³меѓу кои и ние сите некогаш живеевме според телесните желби, извршувајќи ги похотите на телото и на помислите, и по природа бевме како и другите, чеда на гневот, —

⁴но Бог, богат со милост, поради големата Си љубов, со која нѐ засака,

⁵иако бевме мртви поради гревовите наши, нѐ оживе со Христа

⁶и нѐ воскресна со Него и постави на небесата во Христа Исуса,

⁷за да им го покаже на идните векови преизобилното богатство на Својата благодат во добрина кон нас преку Христа Исуса,

⁸зашто по благодат сте спасени преку верата; и тоа не е од вас — Божји дар е;

⁹не е од дела, да не би некој да се пофали.

¹⁰Оти ние сме Негова творба, создадени во Христа Исуса за добри дела, што Бог ги предодредил уште од порано да ги вршиме.

¹¹Затоа помнете, вие, кои некогаш по тело бевте иноверци, и наречени необрезани од така наречените обрезани со телесно обрезание, правено со раце,

¹²дека во она време бевте без Христа, отстранети од општеството на Израилот, без право на учество во заветите на ветеното, без надеж и безбожници во светот;

¹³но сега, во Христа Исуса, вие, кои некогаш бевте далеку, станавте блиски преку крвта Христова.

¹⁴Зашто Он е нашиот мир, Кој од двата народа направи еден и ја разруши преградата, што беше меѓу нив,

¹⁵откако со плотта Своја го уништи непријателството, а со учењето Свое — Законот на заповедите го обессили, за да создаде во Себеси од двата народа еден нов човек, правејќи мир,

¹⁶и во едно тело да ги помири обата народа со Бога преку крстот, откако на него го уништи непријателството.

¹⁷И, откако дојде, Он ви благовести мир, на вас далечни и блиски,

¹⁸зашто преку Него и едните и другите имаме пристап при Отецот, во еден Дух.

¹⁹И така, вие веќе не сте туѓи и придојдени, туку сте им сожители на светиите и свои на Бога,

²⁰оти се утврдивте на темелите, поставени од апостолите и пророците, имајќи Го како аголен камен на темелот Самиот Исус Христос,

²¹врз Кого целата зграда, стројно зглобена, прераснува во свет храм на Господа;

²²врз Кого и вие ќе се соѕидате во живеалиштето Божјо преку Духот.