Read Lamkang Ефесјаните 3 Bible Online

Ефесјаните 3 - Lamkang bible

Ефесјаните 3

¹Затоа сум јас, Павле, затвореник на Исуса Христа за вас незнабошците.

²Бидејќи ја чувте распределбата на благодатта Божја, која ми е дадена за вас,

³односно дека преку откровение Бог ми ја соопшти тајната, како што и погоре ви напишав накратко,

⁴од кое, читајќи, можете да разберете како сум ја сфатил тајната на Христа,

⁵која што, на синовите човечки од поранешните поколенија, не им беше кажана, како што сега се откри на Неговите свети апостоли и пророци преку Светиот Дух.

⁶Тоа стана за да бидат и незнабошците сонаследници, делови на едно тело, и соучесници на ветувањето Божјо во Христа Исуса преку Евангелието,

⁷на кое му станав слуга според дарот на благодатта Божја, дадена по дејство на Неговата сила.

⁸На мене, најмалиот од сите светии, таа благодат ми се даде — да им го проповедам на незнабошците неискажаното богатство Христово

⁹и на сите да им откријам во што се состои распределбата на тајната, криена од векови во Бога, Кој создаде сѐ преку Исуса Христа,

¹⁰та многуразличната премудрост Божја да им се објави сега преку Црквата на началствата и властите небесни,

¹¹според предвечното определение, кое Он го изврши во Христа Исус нашиот Господ,

¹²во Кого, преку верата во Него, имаме слобода да се доближуваме до Бога со доверба.

¹³Поради тоа, ве молам, не паѓајте со духот пред моите маки заради вас, кои се ваша слава.

¹⁴Затоа ги преклонувам колената свои пред Отецот на нашиот Господ Исус Христос,

¹⁵од Кого се именува секој род на небесата и на земјата,

¹⁶да ви даде, по богатството на Својата слава, сила да се утврдите преку Неговиот Дух во внатрешниот човек,

¹⁷и преку верата Христос да се всели во срцата ваши,

¹⁸та вкоренети и утврдени во љубовта, да можете да разбирате со свои светии, што е ширина и должина, што е длабочина и височина,

¹⁹и да ја узнаете Христовата љубов, што го надминува секое знаење, за да се исполните со сета полнота Божја.

²⁰А на Оној, Кој, според силата што во нас дејствува, може да изврши изобилно сѐ, што бараме или помислиме,

²¹Нему нека е слава во Црквата преку Исуса Христа во сите родови и за сите векови. Амин!