Read Lamkang Ефесјаните 5 Bible Online

Ефесјаните 5 - Lamkang bible

Ефесјаните 5

¹И така, угледајте се на Бога, како чеда возљубени,

²и живејте во љубов, како што и Христос нѐ засака и Себеси за нас се предаде како принос и жртва на Бога за пријатен мирис.

³А блудство и секаква нечистота или, пак, користољубивост дури да не се спомнуваат меѓу вас, како што им прилега на светии,

⁴ниту, пак, срамни и празни зборови или смешки, што се неприлични, туку само благодарности.

⁵Зашто ова треба да го знаете, дека ниеден блудник, или нечист, или користољубец — кој е идолопоклоник, нема дел во царството на Христа и Бога.

⁶Никој да не се мами со празни зборови; оти поради овие иде гневот Божји врз синовите на непокорноста;

⁷и така, не станувајте нивни соучесници.

⁸Вие некогаш бевте темнина, а сега сте светлина во Господа: живеете како деца на светлината!

⁹Зашто плодот на Духот се состои во секое добро, правда и вистина, —

¹⁰и испитувајте сѐ што Му е на Бога угодно!

¹¹Не учествувајте во бесплодните дела на темнината, туку изобличувајте ги!

¹²Оти за она, што го прават нечестивите скришум, срамно е и да се зборува.

¹³А сѐ, што е за изобличување, светлината го открива; бидејќи сѐ што е јавно, светлина е.

¹⁴Затоа е речено: »Стани ти што спиеш, воскресни од мртвите, и Христос ќе те осветли!«

¹⁵Па така, гледајте, колку внимателно треба да постапувате: не како неразумни, туку како мудри;

¹⁶ползувајте го времето, зашто дните се лукави.

¹⁷Затоа немојте да бидете нерасудливи, туку распознајте што е волјата Божја!

¹⁸И не опивајте се со вино, од кое произлегува блуд, но исполнувајте се со Дух,

¹⁹усовршувајќи се со псалми и славословија и духовни песни, пеејќи и воспевајќи Го Господа во срцата ваши;

²⁰благодарејќи Му секогаш за сѐ на Бога и Отецот, во името на нашиот Господ Исус Христос;

²¹покорувајте му се еден на друг во страв Божји.

²²Вие, жените, покорувајте им се на мажите свои, како на Господа,

²³зашто мажот е глава на жената, како што е Христос глава на Црквата, и Он е Спасител на телото.

²⁴Но, како што Црквата Му се покорува на Христа, така и жените да им се покоруваат на своите мажи во сѐ.

²⁵Вие, мажите, сакајте ги жените свои, како што и Христос ја засака Црквата и се предаде Себеси за неа,

²⁶за да ја освети, очистувајќи ја со водна бања преку словото;

²⁷та да ја претстави пред Себе како славна Црква, која нема осквернение, или порок, или нешто слично, туку да биде света и непорочна.

²⁸И така, мажите се должни да ги сакаат жените свои како што ги сакаат своите тела; оти, кој ја сака жената своја, тој се сака и самиот себеси.

²⁹Зашто никој никогаш не го намразил телото свое, туку го храни и го стоплува, како и Господ Црквата,

³⁰бидејќи ние сме членови на Неговото тело — од Неговата плот и коските Негови.

³¹Поради тоа човекот ќе го остави татка си и мајката своја, и ќе се придружи кон жената своја, та обајцата ќе бидат една плот.

³²Оваа тајна е голема. Но јас ви зборувам за Христа и за Црквата.

³³И така, секој од вас да си ја сака жената своја, како што се сака самиот себе, а жената да се бои од мажот свој.