Read Lamkang Ефесјаните 6 Bible Online

Ефесјаните 6 - Lamkang bible

Ефесјаните 6

¹Вие, деца, бидете им послушни на родителите свои, во името на Господа, зашто тоа е справедливо.

²Почитувај ги татка си и мајка си! — тоа е првата заповед со ветување,

³за да ти биде добро, и да живееш долго на земјата.

⁴И вие, татковците, не дразнете ги децата свои, туку воспитувајте ги во науката и стравот Господов!

⁵Вие, слугите, бидете им послушни на вашите господари по тело со страв и трепет, во простота на срцето, како на Христа,

⁶Не со слугување за очи како човечки угодници, туку како Христови слуги извршувајќи ја волјата Божја од срце,

⁷усрдно служејќи, како да Му служите на Господа, а не на луѓе,

⁸знаејќи дека секој, па било тоа роб или слободен, ќе добие од Господа според доброто, што го направил.

⁹А и вие, господарите, исто така, однесувајте се кон нив и бидете умерени во строгоста своја, знаејќи дека и над вас самите и над нив има на небесата Господар, во Кого нема лицемерност!

¹⁰Браќа, потсилувајте се во Господа и во силата на Неговата моќ!

¹¹Облечете се во сето оружје Божјо, за да се одржите против ѓаволското лукавство;

¹²оти нашата борба не е против крвта и плотта, туку против началствата, против властите, против светските управители на темнината од овој век, против поднебесните духови на злобата.

¹³Поради тоа примете го сето оружје Божјо, за да можете да се браните во лош ден, та, откако ќе победите, да се одржите.

¹⁴И така стојте, откако ќе се опашете со вистината и ќе се облечете во оклопот на правдата,

¹⁵и нозете да ви бидат обуени во приправност за да благовестите мир.

¹⁶А над сѐ, земете го штитот на верата, со кој ќе можете да ги угаснете сите вжештени стрели на лукавиот;

¹⁷земете го и шлемот на спасението и духовниот меч, кој е словото Божјо!

¹⁸Со секаква молитва и просба молете се со духот во секое време и грижете се за тоа со постојанство и молба за сите светии,

¹⁹и за мене, та, кога ќе ја отворам устата да ми се даде слободно да ја соопштувам тајната на Благовестието,

²⁰поради кое сум пратеник во окови, за да го проповедам смело, како што ми прилега.

²¹А за да знаете и вие, како сум и што работам, за сѐ ќе ве извести Тихик, возљубениот брат и верен слуга во Господа,

²²кого го пратив при вас за истата работа, за да узнаете за нас, и да ги утеши срцата ваши.

²³Мир на браќата и љубов со вера од Бога Отецот и од Господа Исуса Христа.

²⁴Благодат со сите што неизминливо Го сакаат нашиот Господ Исус Христос. Амин!