Read Lamkang 1. Петар 2 Bible Online

1. Петар 2 - Lamkang bible

1. Петар 2

¹Отфрлете, пак, од себеси секаква пакост и секаква измама и лицемерство и завист и секакво напаѓање,

²и како новородените деца, бидете желни за вистинско и разумно млеко, та во него да пораснете за спасение,

³бидејќи вкусивте дека е Господ благ.

⁴Кога пристапувате кон Него, живиот камен, од луѓето отфрлен, но од Бога избран, драгоцен,

⁵и вие сами, како живи камења, изградувајте од себе духовен дом, свештенство свето, за да принесете духовни жртви, кои Му се на Бога пријатни преку Исуса Христа.

⁶Зашто во Писмото стои напишано: »Еве, на Сион клавам аголен Камен, одбран и скапоцен; и кој верува во Него, нема да се посрами!«

⁷Вам, пак, кои верувате, Он ви е чест, а за неверниците — »камен, кого го отфрлија ѕидарите, но кој стана глава на аголот« и »камен за сопнување и камен за соблазнување«,

⁸на кој тие се сопнуваат, не покорувајќи му се на словото; за тоа се тие и одредени.

⁹Но вие сте род избран, царско свештенство, свет народ, луѓе придобиени, за да ги возвестите совршенствата на Оној, Кој ве повикал од темнина во Својата чудна светлина;

¹⁰вие, кои некогаш не бевте народ, а сега сте народ Божји; кои не бевте помилувани, а сега сте помилувани.

¹¹Возљубени, ве молам, како придојдени и гости, да се пазите од телесните желби, што војуваат против душата,

¹²имајќи помеѓу себе добри односи среде незнабошците, па тие, кога ве напаѓаат како злотворци, штом ќе ги видат вашите добри дела, да Го прослават Бога во денот на посетата.

¹³И така, покорувајте се на секое човечко началство, поради Господа: било на цар, како на врховна власт,

¹⁴било на намесници, како негови пратеници за казнување на злочинците, а за пофалба на добротворците!

¹⁵Оти, таква е волјата Божја, — со добротворство да го задржуваме незнаењето на безумните луѓе,

¹⁶како слободни, а не како такви што ја употребуваат слободата како покрив за злобата, туку — како слуги Божји.

¹⁷Почитувајте го секого, браќата сакајте ги, од Бога бојте се, царот почитувајте го!

¹⁸Слуги, покорувајте се на господарите свои, не само на добрите и кротките, туку и на лошите!

¹⁹Оти тоа Му е угодно на Бога, ако некој, од сознание за Бога, поднесува скрб, страдајќи несправедливо.

²⁰Зашто, каква е пофалбата, ако трпите, кога ве бијат поради престапи? Но, ако трпите, кога правите добро и страдате, тоа Му е угодно на Бога.

²¹Бидејќи вие сте за тоа повикани, оти и Христос пострада за нас, оставајќи на пример, за да врвиме по Неговите стапки:

²²Он не направи грев, ниту, пак, во устата Негова се најде измама;

²³кога на Него хулеа, Он не им одвраќаше со хули; кога страдаше, не заплашуваше, туку се потпираше на Оној, Кој праведно суди.

²⁴Он сам ги изнесе нашите гревови на дрвото со телото Свое, та за гревовите да умреме, а да живееме за правдата: »преку Неговата рана се исцеливте«.

²⁵Зашто бевте како овци изгубени, кои немаат пастир, но сега се обрнавте кон Пастирот и Владиката на вашите души.