Read Lamkang 1. Петар 3 Bible Online

1. Петар 3 - Lamkang bible

1. Петар 3

¹А така и вие, жените, бидете им покорни на своите мажи, та, ако некои од нив не му се покоруваат на словото, преку поведението на своите жени да се придобијат без услови,

²кога ќе го видат вашиот чист и богобојазлив живот.

³Вашата убавина да биде не надворешна, односно во плетењето на косите, китењето со злато или облекување на облеки,

⁴туку — внатрешна, во срцето на сокриениот човек, во постојаност и тих дух, што е драгоцено пред Бога.

⁵Оти така некогаш се украсуваа и светите жени, кои се надеваа на Бога и им се покоруваа на мажите свои,

⁶како што Сара го слушаше Авраама, наречувајќи го господар, Вие сте нејзини чеда; ако правите добро, не плашете се од ништо.

⁷Така и вие, мажите, живејте со своите жени разумно, и почитувајте ги како послабо суштество, и како сонаследници на благодатниот живот, за да не се појави препрека во молитвите ваши.

⁸А најпосле, бидете сите еднодушни, жалостиви, братољубиви, милосрдни, дружељубиви, понизни;

⁹не враќајте зло за зло или хула за хула, туку, напротив: благословувајте, знаејќи дека за тоа сте повикани за да наследите благословение.

¹⁰Оти, кој го сака животот и сака да види добри денови, нека го пази јазикот свој од зло, и усните негови да не зборуваат лаги.

¹¹Нека се клони од зло и нека прави добро, нека бара мир и нека се стреми кон него —

¹²бидејќи очите на Господа се обрнати кон праведните, и ушите Негови — кон нивните молитви, а лицето Господово е против оние, кои прават зло, за да ги истреби од земјата.

¹³И кој може да ви направи зло, ако правите добро?

¹⁴Но, ако и страдате за правда, блажени сте; а од страв пред нив не плашете се, ниту, пак да се боите;

¹⁵туку Господа Бога почитувајте го во срцата свои; а бидете секогаш подготвени со кротост и страв за одговор на секого, кој од вас побара сметка за вашата надеж.

¹⁶Имајте добра совест, та со тоа, што ве напаѓаат како злочинци, да се посрамат тие што ве кудат поради добриот ви живот во Христа.

¹⁷Оти, ако ѝ е угодно на Божјата волја, подобро е да страдате, кога вршите добро, отколку — кога вршите лошо,

¹⁸бидејќи и Христос, за да нѐ приведе кон Бога, еднаш пострада за гревовите наши, праведник за неправедните; вистина, мртов по тело, но оживе духом,

¹⁹со кого, откако слезе, им проповеда и на духовите, кои беа во темнина,

²⁰и кои некогаш не се покорија, кога Божјата долготрпеливост ги очекуваше, во деновите на Ноја, при правењето на ковчегот, во кој малкумина, односно осум души се избавија од водата.

²¹Образот на таа вода — крштавањето, но не отстранувањето на телесната нечистотија, туку ветувањето на Бога — добра совест — нѐ спасува сега и нас преку воскресението на Исуса Христа,

²²Кој, откако се вознесе на небото, е оддесно на Бога, а Кому Му се покоруваат ангелите, властите и силите.