Read Lamkang 1. Јован 4 Bible Online

1. Јован 4 - Lamkang bible

1. Јован 4

¹Возљубени, не верувајте му на секој дух, туку испитувајте ги духовите: дали се од Бога, бидејќи многу лажни пророци се јавија во светот.

²По ова познавајте Го Божјиот Дух, и духот на лагата: секој дух, што признава дека Исус Христос дошол во плот, од Бога е.

³А секој дух, што не признава дека во плот дошол Исус Христос, не е од Бога; тоа е духот на антихристот, за кого сте слушале дека иде, па и сега е веќе во светот.

⁴Вие сте, чеда, од Бога и нив сте ги победиле; зашто Оној, Кој е во вас, е поголем од оној што е во светот.

⁵Тие се од светот, затоа и по светски зборуваат, а светот ги слуша.

⁶Ние сме од Бога. Кој Го познава Бога, нѐ слуша нас; кој не е од Бога, нас не нѐ слуша. По тоа и го познаваме Духот на вистината и духот на заблудата.

⁷Возљубени, да се сакаме еден со друг, оти љубовта е од Бога, и секој, кој сака, е роден од Бога и Го познава Бога;

⁸кој не сака, тој не Го познал Бога, оти Бог е љубов.

⁹Божјата љубов кон нас се покажа во тоа, што Бог Го испрати во светот Својот Единороден Син, за да живееме преку Него.

¹⁰Во тоа се состои љубовта, што не ние Го засакавме Бога, туку Бог нас нѐ возљуби и Го прати Синот Свој, за да ги очисти гревовите наши.

¹¹Возљубени, кога така нѐ засака Бог, тоа и ние сме должни да се сакаме еден со друг.

¹²Бога никој никогаш не Го видел. Ако се сакаме еден со друг, Бог пребива во нас и љубовта Негова е совршена во нас.

¹³Дека ние пребиваме во Него и Он во нас, узнавме по тоа, што ни дал од Својот Дух.

¹⁴И ние видовме и сведочиме дека Отецот Го испрати Синот како Спасител на светот.

¹⁵Кој исповеда дека Исус е Син Божји, во него пребива Бог, и тој — во Бога.

¹⁶И ние ја познаваме љубовта, која Бог ја има кон нас, и поверувавме во тоа дека е Бог љубов, и дека оној, кој пребива во љубовта, пребива во Бога, и Бог — во него.

¹⁷Љубовта во нас се усовршува затоа, за да бидеме слободни на судниот ден; бидејќи, како што е Он, така сме и ние во овој свет.

¹⁸Во љубовта страв нема, а совршената љубов го пади стравот, бидејќи стравот има мака. Кој се бои, не е совршен во љубовта.

¹⁹Ние Го сакаме, бидејќи Он порано нѐ засака.

²⁰Ако некој рече: »Го сакам Бога«, а го мрази својот брат, лажец е: оти, кој не го сака својот брат, кого го видел, како може да Го сака Бога, Кого не Го видел?

²¹И таа заповед ја имаме од Него: кој Го сака Бога, да го сака и братот свој.