Read Lamkang Судии 6 Bible Online

Судии 6 - Lamkang bible

Судии 6

¹А синовите Израилев пок почнаа да прват зло пред Господа, и Господ ги предаде во рацете на Мадијамците за седум години.

²Тешка беше раката Мадијамска, над Израилот, и Израилевите синови поради Мадијамците си правеа прибежишта во пештери и тврдини по горите.

³И кога ќе посееше нешто Израилот, ќе дојдеше Мадијамец или Амаликиец или жител од исток, ќе нападнеше на него;

⁴и стоеше кај нив во шаторите, и ги уништуваше земните плодови дури до Газа, и не му оставаше за исхрана на Израилот ни овца, ни вол, ни осел.

⁵Зашто тие доаѓаа со добитокот свој и со шаторите свои, доаѓаа во големо множество — како скакулци; тие и камилите нивни број немаа, и одеа по земјата Израилева за да ја опустошуваат.

⁶Многу осиромаше тогаш Израилот од Мадијамците, и повикаа синовите Израилиеви кон Господа.

⁷А кога синовите Израилеви повикаа кон Господа против Мадијамците,

⁸Господ испрати пророк при Израилевите синови и Он им рече: »Вака вели Господ, Бог Израилев — Јас ви изведов од Египет, ве изведов од домот на ропството;

⁹ве избавив од раката на Египтјаните и од раката на сите ваши угнетувачи, ги истерав од пред вас, и ви ја дадов земјата нивна,

¹⁰и ви реков: ‚Јас сум Господ, Бог ваш; не ги почитувајте боговите на Аморејците, во чија земја живеете.‘«

¹¹Тогаш дојде Ангелот Господов и седна во Ефрат под дабот, кој беше Јоасов, таткото на Авиезер; а синот негов Гедеон млатеше на гумното, за да се сокрие од Мадијамците.

¹²И му се јави Ангелот Господов и му рече: »Со тебе е Господ, мажу силен!«

¹³Гедеон му одговори: »Господару мој, ако е Господ со нас, зошто нѐ снајде сета оваа мака? И каде се сите Негови чудеса, за кои ни раскажуваа нашите татковци, велејќи: ‚Господ нѐ изведе од Египет?‘ Сега Господ нѐ остави и нѐ предаде во рацете на Мадијамците.«

¹⁴Господ го погледна и рече: »Оди со таа своја сила и спаси го Израилот од раката на Мадијамците. Јас те испраќам.«

¹⁵Гедеон Му одговори: »Господи, како ќе го спасам Израилот: ете, и племето ми е најбедно во коленото Манасиево и јас сум најмал во домот на мојот татко?«

¹⁶Господ му рече: »Јас ќе бидам со тебе, и ти ќе ги поразиш Мадијамците како еден човек.«

¹⁷Гедеон Му рече: »Ако сум се здобил со милот пред Тебе, дај ми доказ дека Ти говориш со мене.

¹⁸Не оди си оттука, додека не дојдам кај Тебе, да ти донесам дар свој и да Ти го предадам«. Он рече: »Јас ќе останам, додека се вратиш.«

¹⁹Гедеон отиде и приготви козле и лебови пресни од една ефа брашно; месото го стави во кошница, чорбата ја налеа во грне, ги донесе при Него под дабот и Му ги поднесе.

²⁰И Ангелот Божји му рече: »Земи го месото и погачата, и стави ги на оној камен, а чорбата истури ја.« Тој така и направи.

²¹Ангелот Господов го протегна крајот на жезалот, што беше во раката негова, и го допре месото и лебовите; и вивна оган од каменот и изгореа месото и лебовите. А Ангелот Господов се сокри од очите негови.

²²И виде Гедеон дека тоа беше Ангел Господов и рече Гедеон: »Тешко ми е, Владико Господи, зашто видов лице на Ангел Господов.«

²³Господ му рече: »Мир на тебе, не плаши се, нема да умреш!«

²⁴И Гедеон Му изгради таму жртвеник на Господа и го нарече: Јехова Шалом. Тој стои и до денес во Ефрат Авиезеров.

²⁵Во таа ноќ Господ му рече: »Земи едно теле од стадото на татка ти и едно јуне седумгодишно и разруши го жртвеникот Ваалов, кој што е кај татка ти, и исечи ги дрвцата, што се кај него,

²⁶и изгради Му како што треба жртвеник на твојот Господ Бог, Кој ти се јави на врвот од карпата, па земи го второто теле и принеси го како жртва сепаленица врз дрвцата, што ќе ги исечеш.«

²⁷Гедеон зеде десет души слуги свои и направи како што му рече Господ; но бидејќи се плашеше од домашните на таткото свој и од жителите градски да го направи тоа дење, го направи ноќе.

²⁸Кога утредента градските жители станаа, ете, жртвеникот Ваалов беше разрушен, дрвцата близу него исечени и второто теле принесено како жртва врз новоизградениот жртвеник.

²⁹И си говореа еден на друг: »Кој го направи тоа?« Бараа, распрашуваа и рекоа: »Јоасовиот син Гедеон го направи тоа.«

³⁰И градските жители му рекоа на Јоаса: »Изведи го синот свој; тој треба да умре, зашто го разруши Вааловиот жртвеник и ги исече дрвцата, што беа до него.«

³¹Јоас им кажа на сите што дојдоа при него: »Вие ли ќе се застапувате за Ваал, вие ли ќе го заштитувате? Кој ќе се застапи за него, ќе биде предаден на смрт уште ова утро; ако е тој бог, сам нека се одмазди за тоа што му го срушил жртвеникот негов.«

³²И почнаа да го нерекуваа од тој ден Јероваал, бидејќи Јоас беше рекол: сам нека се одмазди Ваал со него, поради тоа што му го срушил жртвеникот негов.

³³И сите Мадијамци и Амаликовците и жителите од исток се собраа заедно, ја преминаа реката и се сместија во долината Израилска.

³⁴И Духот Господов го поткрепи Гедеона; тој затруби со труба, и племето Авиезерово се собра да оди по него.

³⁵И испрати пратеници по сето племе Манасиево, и тоа се одзва да оди по него; тој исто така испрати пратеници до Асира, Завулона и Нефталима, и тие дојдоа таму да се сретнат.

³⁶А Гедеон Му рече на Бога: »Ако го спасиш Израил преку мојата рака, како што говореше Ти,

³⁷тогаш еве, ќе положам овде на гумното едно руно — ако има роса само на руното, а по целата земја биде суво, ќе знам дека Ти преку мојата рака ќе го спасиш Израилот, како што ми рече.«

³⁸Така и стана: утредента, откако стана рано, фати да го цеди руното и исцеди роса од руното цела чаша вода.

³⁹И Гедеон Му рече на Бога: »Не ми се гневи, ако пак кажам и ако само уште еднаш се обидам со руното — нека биде суво само на руното, а по целата земја да има роса.«

⁴⁰Така и направи Бог во таа ноќ: само на руното беше суво, а по целата земја имаше роса.