Read Lamkang Јуда 1 Bible Online

Јуда 1 - Lamkang bible

Јуда 1

¹Од Јуда, слугата на Исуса Христа, а брат на Јакова — до призваните, осветени во Бога Отецот и запазени од Исуса Христа.

²Милоста, мирот и љубовта да ви се умножат!

³Возљубени, грижејќи се постојано, да ви пишувам за вашето општо спасение, најдов за добро да ви напишам и да ве помолам — да се борите за вистинската вера, која им е дадена на светиите еднаш засекогаш,

⁴зашто се вовлекоа некои луѓе, чија осуда е одамна определена, безбожници, што ја обрнуваат благодатта Божја во нечистотијата и се одречуваат од Единиот Господар Бог и Господ наш Исус Христос.

⁵Сакам да ви напомнам, иако ова веќе го знаете, дека Господ, откако го избави народот од Египетската земја, ги погуби потоа оние, што не веруваа;

⁶ангелите, пак, што не се покоруваа на своето началство, и го напуштија своето живеалиште, ги стави во вечни окови, во мрак за суд на великиот ден.

⁷Како што Содом и Гомор и околните градови, што блудствуваа и на ист начин како и тие налетуваа и на друга плот, станаа пример со тоа што беа накажани со вечен оган.

⁸Исто така ќе стане и со оние, кои ја осквернуваат плотта, ги презираат началниците и достоинството на власта.

⁹А Архангел Михаил, кога се препираше со ѓаволот за Мојсеевото тело, не се осмели да изрече хулна пресуда, туку рече: »Господ да ти забрани!«

¹⁰А овие хулат на она, што не го знаат, а во она, што го знаат во природа како неразумно животно, во него се распаѓаат.

¹¹Тешко ним, оти тргнаа по Каиновиот пат, се фрлија во корисната заблуда на Валаама, и загинаа во буната Кореева.

¹²Тоа се оние што ги поганат вашите вечери на љубовта, јадејќи со вас без страв и се гојат. Тие се безводни облаци, што ветровите ги пренесуваат, есенски неродни дрвја, кои двапати умреле, и се искорнати;

¹³свирепи морски таласи, што се пенат со своите срамоти; ѕвезди лажни, за кое се чува мракот на темнината засекогаш.

¹⁴А за овие пророкуваше и Енох, седмиот од Адама, зборувајќи: »Ете, иде Господ со илјадници Свои свети ангели,

¹⁵за да направи суд над сите и за да ги изобличи сите безбожници за сите нивни нечесни дела, што ги беа направиле со своето беззаконие, и за сите лоши зборови, што ги изрекле за Него безбожните грешници.«

¹⁶Тие се незадоволни викачи, кои живеат според своите желби, а устата нивна произнесува горди зборови, и за корист стануваат ласкатели.

¹⁷Но вие, возљубени, спомнете си ги зборовите, што ги кажаа апостолите на нашиот Господ Исус Христос;

¹⁸оти тие ви зборуваа дека во последно време ќе се појават подигрувачи, кои ќе постапуваат според своите безбожнички желби.

¹⁹Тоа се луѓето што се одделуваат од единството на верата; тие се телесни — и немаат дух.

²⁰А вие, возљубени, изградувајќи се во пресветата ваша вера и молејќи се преку Светиот Дух,

²¹запазете се во љубовта Божја, очекувајќи милост од нашиот Господ, Исуса Христа, за вечен живот.

²²И така разликувајќи ги, едни милувајте,

²³а други со страв спасувајте, истргнувајќи ги од оган и изобличувајќи ги со страв, и гнасејќи се од облеката, испоганета од телото.

²⁴А на Оној, Кој може да ве запази да останете безгрешни и без порок, и да ве постави пред славата Своја во радост, —

²⁵на Единиот премудар Бог, нашиот Спасител преку Исуса Христа, нашиот Господ, слава и величие, држава и власт преку сите векови, сега и во сите времиња. Амин!