Read Lamkang Откровение 2 Bible Online

Откровение 2 - Lamkang bible

Откровение 2

¹На ангелот на Ефеската црква напиши му: ова го вели Оној, Кој ги држи седумте ѕвезди во десницата Своја, Кој оди посреде седумте светилници —

²ги знам делата твои, трудот твој и трпението твое, и дека не можеш да ги трпиш лошите; знам дека си ги испитал оние што себеси се наречуваат апостоли, а не се, и дека си нашол оти се лажци;

³дека си претрпел и дека имаш трпение, дека си се трудел за името Мое и дека не си се уморил.

⁴Но сум против тебе, зашто ја остави својата прва љубов.

⁵Спомни си од каде си паднал, и покај се, и врши ги поранешните дела; ако не, скоро ќе ти дојдам и ќе го преместам светилникот твој од местото негово, ако не се покаеш.

⁶А ова го имаш, ги мразиш делата на николаитите, кои што и Јас ги мразам.

⁷Кој има уво, нека чуе, што им зборува Духот на црквите — на оној, што победува, ќе му дадам да јаде од дрвото на животот, кое што е среде Божјиот рај.

⁸И на ангелот на Смирненската црква напиши му: така вели Првиот и Последниот, Кој беше мртов и еве оживе —

⁹ги знам твоите дела, скрбта и сиромаштијата — но ти си богат — и хулењата на оние, кои за себеси велат дека се Јудејци, а не се, туку се сатанска збирштина.

¹⁰Не бој се воопшто од она, што ќе има да претргаш. Ете, ѓаволот некои од вас ќе фрли в затвор, за да ве искуша, и ќе бидете нажалени десетина дни. Биди верен до самата смрт и ќе ти го дадам венецот на животот.

¹¹Кој има уво, нека чуе што им зборува Духот на црквите: кој победува, втората смрт нема да му нанесе штета.

¹²И на ангелот на Пергамската црква напиши му: вака вели Оној, Кој држи меч со две острици —

¹³ги знам делата твои, и каде живееш, каде е престолот на сатаната, и дека го држиш името Мое, и дека не се одрече од верата Моја дури и во деновите, кога Мојот верен сведок Антипа беше убиен меѓу вас, во чија што средина живее сатаната.

¹⁴Но малку сум против тебе, зашто имаш таму некои, што го држат учењето на Валаама, кој што го учеше Валака да ги наведе на грев синовите Израилеви, та да јадат жртви идолски и да блудствуваат.

¹⁵А имаш и некои, што го држат учењето на николаитите, кое го мразам.

¹⁶Покај се! Ако, пак, не, скоро ќе ти дојдам и ќе стапам во борба против нив со мечот на устата Своја.

¹⁷Кој има уво, нека чуе што им зборува Духот на црквите: на оној, што победува, ќе му дадам да јаде од сокриената мана, и ќе му дадам бело камче, и на камчето напишано ново име, што никој не го знае, освен оној, што го добива!

¹⁸И на ангелот на Тиатирската црква напиши му: ова го вели Синот Божји, Чии очи се како пламен огнен, а нозете слични на сјаен бакар —

¹⁹ги знам твоите дела, и љубовта, и службата, и верата, и трпението твое, и дека твоите последни дела се побројни од првите.

²⁰Но малку сум лут на тебе, зашто позволуваш жената Језавела, која себеси се наречува пророчица, да ги учи и мами слугите Мои да блудствуваат и да јадат идолски жртви.

²¹А ѝ дадов време да се покае за блудството свое, но таа не се покаја.

²²Ете, неа ја фрлам на постела, а оние, што блудствуваа со неа, во маки големи — ако не се покајат за делата свои.

²³И чедата нејзини ќе ги поразам со смрт, и сите цркви ќе узнаат дека Јас сум Оној, Кој ги испитува срцата и бубрезите; и секому од вас ќе му дадам според делата негови.

²⁴А вам и на другите во Тиатир, што не го држат тоа учење и не ги узнаа таканаречените длабини сатански, ви велам: нема да ви наложам друго бреме.

²⁵Но држете го само она, што го имате, додека не дојдам.

²⁶И кој победува и ги пази делата Мои до крај, нему ќе му дадам власт над незнабошците,

²⁷и ќе ги пасе со жезал железен; и тие ќе се строшат како земјани садови; како што и Јас примив власт од Својот Отец.

²⁸Нему ќе му ја дадам ѕвездата Деница.

²⁹Па, кој има уво, нека чуе што им зборува Духот на црквите.