Read Lamkang Откровение 20 Bible Online

Откровение 20 - Lamkang bible

Откровение 20

¹Потоа видов како од небото слегуваше ангел, кој што го имаше клучот од бездната и голема верига во раката своја:

²го фати змевот, древната змија, која што е ѓаволот и сатаната — и го врза за илјада години;

³потоа го фрли во бездната и го заклучи, ставајќи печат врз него за да не ги лаже веќе народите до завршувањето на илјадата година; по ова време тој треба да биде пуштен за малку време.

⁴И видов престоли и седнати на нив, на кои им беше дадено да судат, а и душите, чии глави беа исечени поради сведоштвото Исусово и заради словото Божјо, а и оние, што не му се поклонија на ѕверот, ниту на ликот негов, и не примија белег на челата свои и на рацете свои; и оживеаја и царуваа со Христа илјада години.

⁵Другите, пак, од умрените не оживеаја, додека не се навршат илјадата години. Тоа е првото воскресение.

⁶Блажен и свет е оној, кој има дел во првото воскресение; над нив втората смрт нема власт, а ќе бидат свештеници на Бога и ќе царуваат со Него илјада години.

⁷А кога ќе се навршат илјадата години, сатаната ќе биде пуштен од затворот свој,

⁸и ќе излезе да ги лаже народите по четирите краишта на земјата, Гога и Магога, и да ги собере за војна: бројот нивни е колку морскиот песок.

⁹Тие излегоа по ширината земна и го заобиколија живеалиштето на светиите и возљубениот град; падна од Бога оган небесен и ги проголта.

¹⁰А ѓаволот, што ги лажеше, беше фрлен во огнено и сулфурно езеро, каде што е ѕверот и лажниот пророк: тие ќе бидат мачени дење и ноќе во веки веков.

¹¹И видов голем бел престол и Седнатиот на него, од Чие лице побегнаа земјата и небото, и за нив место не се најде.

¹²Потоа ги видов мртвите, мали и големи, како стојат пред Бога; се отворија книги, и друга книга се отвори — книгата на животот; и судени беа мртвите според запишаното во книгите, според делата нивни.

¹³Морето ги поврати мртвите свои, кои беа во него; смртта и пеколот ги повратија мртвите свои, што беа во нив; и секој прими суд според делата свои.

¹⁴А смртта и пеколот беа фрлени во огнено езеро. Тоа е втората смрт.

¹⁵И кој што не беше запишан во книгата на животот, беше фрлен во огненото езеро.