Read Lamkang Откровение 8 Bible Online

Откровение 8 - Lamkang bible

Откровение 8

¹Кога го отвори седмиот печат, настана тишина на небото околу половина час.

²И ги видов седумте ангели, што стоеја пред Бога и им се дадоа седум труби.

³Тогаш дојде друг ангел со златна кадилница и застана пред жртвеникот; и му се даде многу темјан, та со молитвите на сите светии да го постави на златниот жртвеник, што беше пред престолот.

⁴Димот од темјанот со молитвите на светиите се издигна од раката на ангелот пред Бога.

⁵И ја зеде ангелот кадилницата, и ја наполни со оган од жртвеникот, и ја фрли на земјата, и тогаш се појавија гласови, грмотевици, светкавици и земјотрес.

⁶И седумте ангели, што ги држеа седумте труби, се приготвија да затрубат.

⁷Првиот ангел затруби, и се појави град и оган, смешани со крв, и паднаа на земјата. И една третина од дрвјата изгореа, и сета трева зелена изгоре.

⁸Затруби и вториот ангел — и како некоја голема гора, пламната во оган, се срина во морето; и третината од морето се претвори во крв;

⁹и умре третината од морските суштества, кои што имаа душа; и една третина од лаѓите пропаднаа.

¹⁰И третиот ангел затруби, и од небото падна голема ѕвезда, која гореше како светило, и падна врз третината од реките и водните извори.

¹¹А името на таа ѕвезда е Пелин. И третиот дел од водите загорчи како пелин, и многу луѓе умреа од водите, бидејќи беа загорчени.

¹²Потоа затруби и четвртиот ангел, и беше удрена третината од сонцето, третината од месечината и третината од ѕвездите, за да им потемнее нивниот трет дел, та третината од денот, како и на ноќта, да не свети.

¹³И видов и чув еден орел како лета посреде небото и да вика со висок глас: »Тешко, тешко, тешко на оние што живеат по земјата од другите трубни гласови на трите ангели, што ќе трубат!«