Read Lamkang Откровение 9 Bible Online

Откровение 9 - Lamkang bible

Откровение 9

¹Затруби и петтиот ангел, и видов ѕвезда како падна од небото на земјата. И ѝ се даде клучот од кладенецот на бездната;

²па го отвори кладенецот на бездната, и од кладенецот излезе дим како дим од голема печка; сонцето и воздухот потемнеа од димот на изворот.

³И од димот се појавија скакулци по земјата, и им се даде власт, каква што имаат земните скорпии.

⁴И им се рече: да не ја повредуваат земната трева, ниту какво и да било зеленило, ниту некое дрво, а само оние луѓе, кои немаат печат Божји на челата свои.

⁵И им се даде не да ги убиваат, туку само да ги мачат пет месеци; и мачењето нивно беше како мачење од скорпија, кога каснува човек.

⁶Во тие дни луѓето ќе ја бараат смртта, но нема да ја најдат; ќе посакаат да умрат, но смртта ќе бега од нив.

⁷По својот облик скакулците личеа на коњи, приготвени за војна: на главите нивни имаше како златни круни, а лицата им беа како лица човечки;

⁸имаа коси како косите на жени, а забите им беа како заби на лавови.

⁹И имаа оклопи како оклопи од железо; а шумот на нивните крилја беше како шум на коли со многу коли со многу коњи, кои трчаат во војна.

¹⁰Имаа, пак, опашки како скорпиите, а на опашките осила и им беше дадена сила да им пакостат на луѓето пет месеци.

¹¹И за цар над себеси го имаа ангелот на бездната; името негово по еврејски е Авадон, а по Елински — Аполион.

¹²Едното зло помина, еве идат уште две зла по него.

¹³И шестиот ангел затруби, и чув еден глас од четирите рога на златниот жртвеник, што е пред Бога,

¹⁴кој му зборуваше на шестиот ангел, кај кого беше трубата: »Ослободи ги четирите ангели, врзани при големата река Еуфрат!«

¹⁵И беа одврзани четирите ангели, кои беа приготвени за часот и денот, за месецот и годината, за да ја убијат третината од луѓето.

¹⁶Бројот на коњаниците беше двесте милиони — го чув нивниот број.

¹⁷И така во видение ги видов коњите и оние, кои јаваа на нив, што имаа оклопи огнени и синкасти и сулфурни. Главите на коњите личеа на глави од лавови, а од устата нивна излегуваше оган, дим и сулфур.

¹⁸А од тие три зла — огнот, димот и сулфурот, што излегуваа од нивната уста, умре третината од луѓето;

¹⁹бидејќи нивната сила беше во нивната уста, а опашките нивни, што личеа на змии, имаа глави со кои пакостеа.

²⁰А другите луѓе, што не загинаа од тие зла, не се покајаа за делата на рацете свои, та да не се поклонуваат ни на ѓаволи ни на идоли златни и сребрени, бакарни, камени и дрвени, кои не можат ниту да гледаат, ниту да слушаат, ниту, пак, да одат;

²¹и не се покајаа ни за убиствата свои, ни, пак, за вражбите свои, ниту за блудството свое, нити за кражбите свои.