Read Lamkang 1 Царства 7 Bible Online

1 Царства 7 - Lamkang bible

1 Царства 7

¹Жителите на Киријат-Јарим дојдоа, го зедоа ковчегот на заветот Господов и го однесоа во куќата на Аминадава, на ридот, а синот негов Елеазар го посветија да го чува ковчегот на заветот Господов.

²Од оној ден, кога ковчегот остана во Киријат-Јарим, измина многу време-дваесет години. И сиот Израилев дом се обрна кон Господа.

³И му рече Самуил на сиот Израилев дом, велејќи: »Ако од сѐ срце се обрнувате кон Господа, отстранете ги од средината своја туѓите богови и боговите од горичките, расположете го срцето свое кон Господа и Нему единствено служете Му, и Он ќе ви избави од филистејските раце.«

⁴И Израилевите синови ги отстранија разните Вааловци и Астарти и почнаа да му служат само на Господа.

⁵И рече Самуил: »Соберете ги сите Израилци во Масифа, и јас ќе Му се помолам на Господа за вас.«

⁶И се собраа во Масифа, и црпеа вода — ја истураа пред Господа, и постеа тој ден, велејќи: »згрешивме пред Господа.« А Самуил им судеше на синовите Израилеви во Масифа.

⁷Кога Филистејците чуја дека синовите Израилеви се собрале во Масифа, кнезовите нивни излегоа против Израилот; Израилците откако го слушнаа тоа, се уплашија од Филистејците.

⁸Тогаш Израилевите синови му рекоа на Самуила: »Не престанувај да го молиш Господа, нашиот Бог за нас, та некако да нѐ спаси од филистејските раце.« А Самуил рече: »Не може да биде, јас да отстапам од Господа, мојот Бог, и да не се молам за вас во молитвата своја!«

⁹И Самуил зеде едно јагне цицалче и го принесе заедно со сиот народ како жртва сепаленица на Господа; повика Самуил кон Господа за Израилот и Господ го чу.

¹⁰И кога Самуил ја принесуваше сепаленицата, Филистејците дојдоа да се бијат против Изрилот. Но тој ден Господ загрме со силен татнеж над Филистејците и испрати против нив силен ужас, и тие се збркаа и беа поразени пред Израилот.

¹¹Израилците излегоа од Масифа, ги гонеа Филистејците и ги разбиваа до под Ветхор.

¹²И Самуил зеде еден камен и го стави меѓу Масифа и Сен, и го нарече Авен-Зер, што значи довде ни помогна Господ.

¹³Така беа смирени Филистејците и не доаѓаа веќе во пределите Израилеви; и раката Господова беше врз Филистејците преку сите денови на Самуила.

¹⁴А му беа вратени на Израилот градовите, што Филистејците ги беа презеле од Израилот, од Акарон дури до Гет, и Израил ги ослободи пределите нивни од филистејски раце, и настана мир меѓу Израилот и Аморејците.

¹⁵И Самуил беше судија над Израила преку сите денови на својот живот;

¹⁶и секоја година одеше и го обиколуваше Ветил, Галгал, и Масифа и му судеше на Израилот по сите тие места;

¹⁷потоа се враќаше во Арматем, бидејќи таму беше куќата негова, таму живееше и таму му судеше на Израилот, а таму изгради и жртвеник на Господа.