Read Свето Писмо: Стандардна Библија 2006 (со девтероканонски книги) 1 Летописи 16 Bible Online

1 Летописи 16 - Свето Писмо: Стандардна Библија 2006 (со девтероканонски книги) bible

1 Летописи 16

¹Го донесоа ковчегот Божји и го поставија среде скинијата, што ја беше направил Давид за него и Му принесе на Бога жртви сепаленици, и помирителни жртви.

²Кога Давид заврши со сепалениците и принесувањето на помирителни жртви, го благослови народот во името Господово,

³и им раздаде на сите Израелци, и на мажи и на жени, по еден леб, по едно парче месо и по чаша вино.

⁴Тогаш постави тој на служба пред ковчегот Господов некои од левитите, за да славословат, да благодарат и да Го превознесуваат Господ, Бог Израелов:

⁵Асаф — за раководител, втор по него — Захарија, Јеиел, Шемирамот, Јехиил, Матитија, Елијав, Ванеја, Аведар и Јеиел со харфи и лири, и Асаф — да удира на кимвали,

⁶а Ванеја и Јахазиел, свештеници, — да трубат постојано пред ковчегот на заветот Божји.

⁷Во тој ден Давид за првпат даде псалм за славословие на Господ преку Асаф и браќата негови:

⁸„Славете Го Господа, разгласувајте го името Негово; кажувајте ги делата Негови меѓу народите;

⁹пејте Му, свирете Му; раскажувајте за сите Негови чудеса;

¹⁰фалете се со Неговото свето име; нека се весели срцето на оние, кои Го бараа Господа;

¹¹побарајте Го Господа и силата Негова, барајте го постојано лицето Негово,

¹²спомнувајте ги чудесата, што ги изврши, знаците Негови и судовите од устата Негова;

¹³вие, семе Израелово, слуги Негови, синови Јаковови, избраници Негови!

¹⁴Тој е Господ, Бог наш; Неговите судови се по целата земја.

¹⁵Помнете го вечно заветот Негов, словото, што го заповеда за илјада родови,

¹⁶она, што му го вети на Авраам и во кое му се колнеше на Исак.

¹⁷Тој му ја постави на Јаков за закон и на Израел за вечен завет,

¹⁸велејќи: ‚Тебе ќе ти ја дадам земјата хананска, како ваш наследен дел.‘

¹⁹Тие тогаш беа малубројни, мошне малку и во неа беа придојдени,

²⁰и талкаа од народ до народ и од едно царство до друго племе;

²¹но не дозволи никому да ги навредува и ги разобличуваше заради нив царевите:

²²‚не гибајте ги Моите помазаници и не правете им зло на Моите пророци.‘

²³Пеј Му на Господ, цела земјо, навестувајте го од ден во ден спасението од Него.

²⁴Разгласувајте ја меѓу незнабошците славата Негова, и меѓу сите луѓе чудесата Негови,

²⁵зашто Господ е голем и достоен за слава, пострашен од сите богови.

²⁶Зашто сите богови на народите се ништо, а Господ ги создаде небесата.

²⁷Слава и величие пред лицето Негово, сила и радост во Неговото Свето место.

²⁸Воздајте Му на Господ, племиња народни, воздајте Му на Господ слава и чест!

²⁹Воздајте Му ја на Господ славата на името Негово. Принесете дар, дојдете пред лицето Негово, поклонете Му се на Господ во сјајот на светлината Негова.

³⁰Трепери пред Него, цела земјо, зашто Тој ја основа вселената, и таа нема да се разниша.

³¹Нека се веселат небесата, да ликува земјата, и нека се вели меѓу народите: ‚Господ царува!‘

³²Нека се бранува морето и сѐ што го исполнува, да се радува полето и сѐ што е на него.

³³Да ликуваат заедно сите дрвја во лаговите пред лицето на Господ, зашто Тој доаѓа да ја суди земјата.

³⁴Славете Го Господа, зашто Тој е добар и милоста Му е вечна,

³⁵и речете: ‚Спаси нѐ, Боже, Спасителе наш! Собери нѐ и избави нѐ од народите, за да го славиме Твоето свето име и да се фалиме со Твојата слава!‘

³⁶Благословен Господ, Бог Израелов, отсекогаш и засекогаш!“ И сиот народ рече: „Амин, алилуја!“

³⁷Давид ги остави таму, пред ковчегот на заветот Господов, Асаф и браќата негови за да служат пред ковчегот постојано, секој ден,

³⁸Аведар и браќата негови, шеесет и осум души; Аведар, син Једутунов, и Хоса — за вратари;

³⁹а свештеникот Садок и браќата негови, свештеници, ги остави пред Господовиот дом, што беше на висината на Гаваон,

⁴⁰за да принесуваат жртви на Господ врз жртвеникот за сепаленици постојано — наутро и навечер, и за сѐ што е пишано во законот на Господ, што Тој му го даде на Израел;

⁴¹и со нив Еман и Једутун и другите избраници, кои беа именувани посебно, за да Го слават Господа, зашто милоста Негова е вечна.

⁴²Со нив Еман и Једутун да Го слават Бога, свирејќи со труби и кимвали и со разни свирки; а синовите Једутунови ги постави кај вратата.

⁴³Потоа се разотиде сиот народ, секој во домот свој; си отиде и Давид, за да го благослови својот дом.