Read Свето Писмо: Стандардна Библија 2006 (со девтероканонски книги) 1 Летописи 23 Bible Online

1 Летописи 23 - Свето Писмо: Стандардна Библија 2006 (со девтероканонски книги) bible

1 Летописи 23

¹Кога остаре и се засити од животот, Давид го постави за цар над Израел синот свој Соломон.

²И ги собра сите началници израелски, свештениците и левитите;

³а левитите од триесет години и нагоре беа преброени: бројот нивни, на сите до еден, беше триесет и осум илјади души.

⁴Од нив беа определени за работа во домот Господов дваесет и четири илјади, писари и судии — шест илјади,

⁵четири илјади вратари и четири илјади, оние што ќе Го слават Господа со свирки, направени од Давид за прославување на Господ.

⁶И ги раздели Давид на смени според Левиевите синови — Гирсон, Каат и Мерари.

⁷Од Гирсоновите беа: Ладан и Семеј.

⁸Синови Ладанови: прв Јехиил, Зетам и Јоил — тројца.

⁹Синови Семеиеви: Шеломит, Хазиел и Аран — тројца. Тие беа Ладанови родовски началници.

¹⁰А и уште синовите Семеиеви: Јахат, Зина, Јеус, Берија. Тоа беа синови Семеиеви — уште четворица.

¹¹Јахат беше главен, Зина втор; Јеус и Берија имаа малку деца, затоа беа приброени со татковиот дом.

¹²Синовите Каатови: Амрам, Ицхар, Хеврон и Узиил — четворица.

¹³Синовите Амрамови: Арон и Мојсеј. Арон беше определен да ги посветува најсветите работи довека, тој и синовите негови, за да кадат пред лицето на Господ, да Му служат и да го благословуваат Неговото име довека.

¹⁴А Мојсеј, човек Божји, и синовите негови беа придодадени кон Левиевото племе.

¹⁵Синови Мојсееви: Гершом и Елиезер.

¹⁶Синови Гершомови: прв беше Шевуел.

¹⁷Синови Елиезерови беа: прв Рихавија. Други синови Елиезер немаше; а Рихавија имаше многу синови.

¹⁸Синови Јицхарови: прв Шеломит.

¹⁹Синови Хевронови: прв Јерија, втор Амарија, трет Јахазиел и четврти Јекамам.

²⁰Синови Узиилови: прв Миха и втор Јишија.

²¹Синови Мерариеви: Махли и Муши. Синови Махлиеви: Елеазар и Кис.

²²Елеазар умре и немаше синови, туку само ќерки; и се оженија со нив синови Кисови, нивни братучеди.

²³Синови Мушиеви: Махли, Едер и Јеремот — тројца.

²⁴Тоа беа синовите Левиеви според домовите на татковците нивни, глави на домовите, што беа преброени сите до еден по име, а кои ги вршеа службите во домот Господов, од дваесет години нагоре.

²⁵Зашто Давид рече: „Господ, Бог Израелов, му даде мир на Својот народ и го насели во Ерусалим засекогаш,

²⁶та левитите нема да имаат потреба да ја носат скинијата и секакви нејзини предмети за служење во неа.“

²⁷Затоа, според последните Давидови заповеди, беа преброени левитите од дваесет години и нагоре,

²⁸за да бидат покрај синовите Аронови, да служат во домот Господов, во дворот и во тремовите, да пазат на чистота во целото светилиште и да ја извршуваат секоја служба во Божјиот дом;

²⁹да ги надгледуваат принесените лебови, пченичното брашно за лебен принос, пресните пити, сѐ печено и пржено и над сите мерки и тежини;

³⁰секое утро да стојат за да благодарат и да Го славословат Господа, како и навечер,

³¹при сите сепаленици, принесувани на Господ во саботни дни, во новомесечијата и во празниците според бројот, како што е заповедано за нив, — постојано пред лицето на Господ, —

³²и да ја пазат скинијата на собранието, светилиштето и синовите Аронови, нивни браќа, на службите во домот Господов.