Read Свето Писмо: Стандардна Библија 2006 (со девтероканонски книги) Ездра 6 Bible Online

Ездра 6 - Свето Писмо: Стандардна Библија 2006 (со девтероканонски книги) bible

Ездра 6

¹Тогаш царот Дариј издаде заповед, и бараа во Вавилон, во архивот, каде што ги чуваа важните документи.

²И во Ахмета, во дворецот, кој е во областа Мидија, беше пронајден еден свиток, и во него беше напишано вака: „Потсетник.

³Во првата година од владеењето на царот Кир, царот издаде указ за домот Господов во Ерусалим: Нека биде изграден дом на она место, каде што принесуваат жртви, и нека му се постават здрави темели; висината негова — шеесет лакти, ширината негова — шеесет лакти;

⁴три реда големи камења, еден ред дрва; а трошоците нека се плаќаат од царскиот дом.

⁵Уште и садовите на Божјиот дом, златни и сребрени што Навуходоносор ги изнесол од ерусалимскиот храм и ги однел во Вавилон, нека се вратат и однесат во ерусалимскиот храм и да бидат наместени во Божјиот дом, секој на свое место.

⁶Затоа, Татенај, кој управуваш со задречната област, и ти Ситар-Бознај и вие нивни соработници, испратени во областа зад Реката, бидете на разумна оддалеченост оттаму!

⁷Не запирајте ја работата на Божјиот дом; јудејскиот кнез и јудејските старешини нека го градат оној Божји дом на местото негово.

⁸А јас издадов указ, според кој треба да им помагате на тие старешини јудејски во градбата на овој дом Божји, односно: од царскиот имот — од данокот на задречната област да им се дава на тие луѓе за да не се запира работата;

⁹и колку што ќе бидат потребни — телиња, овни или јагниња за сепаленици на Бога небесен, исто така и пченица, сол, вино и масло, толку, колку што ќе определат свештениците ерусалимски, нека им се дава секој ден без прекин,

¹⁰за да принесуваат благопријатни жртви на Бога небесен, и да се молат за животот на царот и синовите негови.

¹¹Заповедам уште — кој ќе ја измени оваа наредба, да извадат греда од куќата негова, да го издигнат и приковаат на неа, а куќата негова поради тоа да се претвори во урнатини.

¹²И Бог, Чие име престојува таму, да го собори секој цар и народ што ќе протегне рака да го измени ова за штета на тој дом Божји во Ерусалим. Јас, Дариј, го издадов овој указ, нека биде точно спроведен!“

¹³Тогаш Татенај, управителот на задречната област, Ситар-Бознај и нивните соработници, постапуваа точно онака, како што заповеда царот Дариј.

¹⁴И јудејските старешини градеа и напредуваа според пророштвото на пророкот Агеј и Захарија, синот на Идо. Изградија и завршија според волјата на Бог Израелов и според волјата на Кир, Дариј и Артаксеркс, цареви персиски.

¹⁵Завршен беше овој дом на третиот ден од месец адар, во шестата година од царувањето на царот Дариј.

¹⁶И синовите Израелови, свештениците, левитите и другите, што се беа вратиле од пленство, со радост го извршија осветувањето на тој Божји дом.

¹⁷И принесоа при осветувањето на тој Божји дом: сто вола, двесте овни, четиристотини јагниња и дванаесет јарци како жртва за грев за целиот Израел, според бројот на племињата Израелови.

¹⁸И поставија свештеници според чиновите нивни и левити според родовите нивни за Божја служба во Ерусалим, како што беше заповедано во книгата Мојсеева.

¹⁹Потоа вратените од пленство прославија Пасха во четиринаесеттиот ден на првиот месец,

²⁰зашто свештениците и левитите се беа очистиле, — тие сите до еден беа чисти; и заклаа пасхални јагниња за сите вратени од пленство, за своите браќа свештеници и за себеси.

²¹И јадеа синовите Израелови што се беа вратиле од пленство, и сите што се беа откажале од нечистотијата на народите на земјата за да Му се поклонат на Господ, Бог Израелов.

²²А го празнуваа со радост и празникот Бесквасници седум дена, зашто Господ ги зарадува и го сврте кон нив срцето на асирскиот цар за да ги поткрепи рацете нивни при градењето на домот на Господ, Бог Израелов.