Read Свето Писмо: Стандардна Библија 2006 (со девтероканонски книги) Естира 4 Bible Online

Естира 4 - Свето Писмо: Стандардна Библија 2006 (со девтероканонски книги) bible

Естира 4

¹Кога Мардохеј дозна за сѐ што се правеше, ја раскина облеката, стави врз себе вреќиште и пепел, излезе среде градот и викаше силно и со огорченост: „Се истребува народ во ништо необвинет.“

²И дојде до царската порта и запре, бидејќи не можеше да влезе со вреќиште и со пепел.

³Исто така и во секоја област и место, каде и да пристигнеше заповедта на царот и повелбата негова, настануваше голема тага кај Јудејците и пост и плачење и викање; вреќиштата и пепелта им служеа како постела на мнозина.

⁴Дојдоа слугинките и дворјаните на Естира и ѝ раскажаа сѐ; царицата силно се возбуди. Таа испрати облека да го преоблечат Мардохеј и да го симне од себе вреќиштето. Но тој не ги прими.

⁵Тогаш Естира го повика Хатах, еден од евнусите на царот, кого тој го беше одредил да биде покрај неа, и го испрати кај Мардохеј да дознае: што значи тоа и зошто е?

⁶Хатах отиде кај Мардохеј на градскиот плоштад што беше пред царската порта.

⁷Мардохеј му раскажа за сѐ што се беше случило со него, и за определеното количество сребро, што Аман го беше ветил да го одмери во царската ризница за да бидат истребени Јудејците;

⁸и му врачи препис од повелбата, објавена во Суза, за истребувањето нивно за да ѝ ја покаже на Естира, та таа да дознае за сѐ; притоа ѝ порача да оди кај царот и да му се моли за својот народ.

⁹Хатах дојде и ѝ ја предаде на Естира пораката на Мардохеј.

¹⁰И му рече Естира на Хатах, испраќајќи го, да му каже на Мардохеј:

¹¹„Сите слуги кај царот и народите во царските области знаат дека секој, било тоа маж или жена, што ќе влезе кај царот од внатрешниот двор, а да не е повикан, го очекува една пресуда — смрт; само оној, кон кого царот ќе го пружи својот златен жезол, останува жив. А јас не сум повикана кај царот еве веќе триесет дена.“

¹²И му ги пренесоа на Мардохеј зборовите на Естира.

¹³Мардохеј во одговор ѝ рече на Естира: „Не мисли дека ти единствена од сите Јудејци ќе се спасиш во царскиот дом.

¹⁴Ако ти премолчиш во ова време, тогаш слободата и спасението на Јудејците ќе дојде од друго место, а ти и домот на таткото твој ќе загинете. И кој знае, дали токму за вакво време не си достигнала царско достоинство?“

¹⁵А Естира му одговори на Мардохеј, велејќи:

¹⁶„Оди, собери ги сите Јудејци што се наоѓаат во Суза, и постете за мене, и не јадете, и не пијте три дена, ни дење ни ноќе, и јас со слугите свои исто така ќе постам и потоа ќе одам кај царот, иако е тоа и против законот, па ако загинам — нека загинам.“

¹⁷Тогаш отиде Мардохеј и направи, како што му порача Естира.