Read Свето Писмо: Стандардна Библија 2006 (со девтероканонски книги) Излез 22 Bible Online

Излез 22 - Свето Писмо: Стандардна Библија 2006 (со девтероканонски книги) bible

Излез 22

¹„Ако се фати крадец, како пробива ѕид и го удрат така, што тој умре, тоа не се смета за убиство.

²Но, ако сонцето веќе се појавило над него, тогаш да се бара крвнина. А крадецот штетата мора да ја надомести. А, ако нема ништо, тогаш тој да биде продаден и да се надомести украденото.

³Ако кај фатениот се најде она, што го украл, живо, било вол, магаре или овца, да го врати двојно.

⁴Ако некој уништи нива, или лозје, пуштајќи го добитокот свој да пасе во туѓа нива, да надомести со најдоброто од својата нива и најдоброто од своето лозје.

⁵Ако се појави оган, па тој го зафати трњето, и се запалат снопјето, или ожниеното, или нивата, оној, кој го предизвикал пожарот, да плати.

⁶Кога некој му даде на ближниот свој сребро или предмети на чување, и тие бидат украдени од неговиот дом, крадецот, ако се фати, нека плати двојно;

⁷ако, пак, крадецот не се фати, тогаш сопственикот на куќата нека се јави пред Бога, па нека се заколне дека тој не посегнал врз имотот на својот ближен.

⁸За секој спорен предмет: за вол, магаре, овца, облека, за секој изгубен предмет, за кој некој тврди дека е негов, нивниот спор треба да дојде пред Бога: па кого ќе го осуди Бог, тој нека му плати на ближниот двојно.

⁹Ако некој му даде на чување на ближниот свој магаре, или вол, или овца, или некој друг добиток, и тој добиток пцовиса, или се повреди, или, пак, биде откраднат, а никој тоа не го види,

¹⁰тогаш меѓу нив нека одлучи клетвата пред Господ дека оној не посегнал врз имотот на својот ближен, и ако сопственикот така го прими, не се надоместува;

¹¹ако, пак, му биде украден, тогаш нека му плати на сопственикот негов.

¹²А ако е изеден од ѕверка, да донесе доказ за тоа и да не плаќа ништо.

¹³Ако некој од ближниот свој добие на услуга добиток, па тој биде повреден или пцовиса, а сопственикот не бил со него, ќе мора да се плати;

¹⁴но, ако сопственикот бил со него, да не се плаќа. Ако, пак, бил земен под наем, да се плати само наемот.

¹⁵Кој измамил несвршена девојка, и биде со неа, да ја дарува и да ја земе за жена;

¹⁶а ако таткото нејзин одбие да му ја даде, да одмери сребро на татко ѝ колку што следува за мираз на девојката.

¹⁷Вражарка да не оставате жива.

¹⁸Кој ќе легне со добиток, со смрт да се казни.

¹⁹Кој принесува жртва на други богови, освен на Единиот Господ, со смрт да се истреби.

²⁰Доселеник немој да притеснуваш, ниту да го угнетуваш, зашто и вие бевте доселеници во земјата египетска.

²¹Не притеснувајте, ни вдовици, ни сираци;

²²ако ги притесниш и тие повикаат кон Мене, ќе го чујам нивниот лелек,

²³и ќе се распали гневот Мој, па со меч ќе ве убијам, и вашите жени ќе останат вдовици, а вашите деца — сираци.

²⁴Кога на заем ќе дадеш пари на некој сиромашен од народот Мој, не присилувај го и не наложувај му лихва.

²⁵Ако ја земеш во залог облеката од ближниот твој, врати му ја до зајдисонце;

²⁶бидејќи таа му е единствена покривка, облека што го чува телото негово: со што ќе спие тој? И кога ќе повика кон Мене, Јас ќе го чујам, бидејќи сум милостив.

²⁷Не проколнувај Го Господа, ни за старешината на твојот народ не зборувај лошо.

²⁸Не воздржувај се да ги принесеш првите плодови од жетвата и лозјето; давај Ми го првородениот од синовите твои.

²⁹Така прави, и со крупниот, и со ситниот твој добиток; седум дена нека бидат кај својата мајка, а во осмиот ден дај Ми ги Мене.

³⁰И ќе Ми бидете свет народ. Затоа и месо од растргнато животно да не јадете; фрлај им го на кучињата.“