Read Свето Писмо: Стандардна Библија 2006 (со девтероканонски книги) Излез 25 Bible Online

Излез 25 - Свето Писмо: Стандардна Библија 2006 (со девтероканонски книги) bible

Излез 25

¹И Господ му рече на Мојсеј, велејќи:

²„Кажи им на синовите на Израел да Ми соберат прилози: земете прилог кој од драго срце Ми дава.

³А прилогот што ќе го земете од нив да биде: злато, сребро и бакар;

⁴волна сина, црвена и светлоцрвена, лен и козина;

⁵и црвени овнешки кожи, фини кожи и дрвја од шитим;

⁶масло за светење, и мириси за маслото за помазание и за мирисно кадило;

⁷камења оникс и камења за украсување на ефодот и наградникот.

⁸Да Ми направите светилиште, од каде што ќе ви се јавувам вам.

⁹Сѐ, како што ќе ти покажам Јас на планината: и образецот на скинијата, и образецот на сите предмети во неа — така да направите.

¹⁰Направете ковчег од дрвото шитим, во должина од два и пол лакта, а во ширина еден и пол лакот, и во висина еден и пол лакот;

¹¹и опкови го со чисто злато: опкови го однатре и однадвор; направи му златен венец околу врвот;

¹²и излиј за него четири алки од злато, и постави ги на четирите негови долни агли: две алки од едната страна и две алки од другата страна.

¹³Направи од дрвото шитим лостови, и опкови ги со злато,

¹⁴и провлечи ги лостовите низ алките од обете страни на ковчегот, за да се носи на нив ковчегот;

¹⁵лостовите во алките на ковчегот нека стојат, да не се вадат од нив.

¹⁶А во ковчегот положи го заветот, што ќе ти го дадам.

¹⁷Направи исто така и чистилиште: капак од чисто злато, долго два и пол лакта, а широко еден и пол лакот.

¹⁸И направи два херувима од злато, ковани направи ги и постави ги на двата краја од капакот;

¹⁹направи херувими: еден од едната страна, а друг од другата страна на капакот; направи ги херувимите на обете страни од чистилиштето.

²⁰Херувимите да бидат со крилата угоре, та со крилата да го засолнуваат капакот, а со лицата свртени еден спроти друг; лицата на херувимите нека бидат свртени кон чистилиштето.

²¹И стави го капакот одозгора врз ковчегот, а во ковчегот положи го заветот, што ќе ти го дадам Јас:

²²и тука, над капакот, меѓу двата херувима, кои ќе бидат над ковчегот на заветот, ќе ти се јавувам тебе и оттаму ќе ти зборувам тебе и за сѐ ќе им заповедам преку тебе на синовите израелски.

²³Направи и маса од дрвото шитим: долга два лакта, а широка еден лакот, висината да ѝ е лакот и половина.

²⁴И опкови ја со чисто злато, а направи и златен венец околу неа;

²⁵и направи ѝ наоколу страници една дланка широки со венец наоколу;

²⁶а направи за неа и четири алки од злато, и прицврсти ги алките на четирите агли од нејзините четири нозе;

²⁷на страниците нека има алки, за да можат во нив да се стават лостови, па трпезата со нив да се подигнува;

²⁸направи ги лостовите од дрвото шитим и опкови ги со злато; и со нив ќе се крева трпезата.

²⁹Направи за неа чинии, кадилници, чаши и црпки, со кои ќе се врши преливање; а ќе ги направиш од чисто злато.

³⁰На трпезата поставувај ги секогаш лебовите принесени пред Мене.

³¹И направи светилник од чисто злато; светилникот нека биде кован; неговиот столб, неговите гранки и чашки со јаболкца и неговите цветови — сите тие од него да излегуваат;

³²шест гранки нека излегуваат од страните: три гранки од едната страна на светилникот, а три гранки од другата страна на светилникот;

³³три чашки во облик на бадемов цвет, со јаболче и цветови нека има едната гранка, и три чашки како бадемов цвет, со јаболче и цветови на другата гранка; и така нека има на шесте гранки, што излегуваат од светилникот,

³⁴а на самиот светилник нека има четири чашки во вид на бадемов цвет, со јаболкца и цветови;

³⁵едно јаболче под две гранки, од него, и едно јаболче под другите две гранки, од него, и едно јаболче под другите две гранки — така под шесте гранки што излегуваат од светилникот.

³⁶Јаболчињата и гранките нивни од него треба да излегуваат; целиот да биде кован од чисто злато.

³⁷И направи му седум кандила, и стави ги кандилата негови да светат од предната негова страна;

³⁸а и штипките и пепеларките за нив нека бидат од чисто злато;

³⁹од еден кикар чисто злато да направиш свеќник, со сиот негов прибор.

⁴⁰И гледај да ги направиш според образецот, што ти беше покажан на планината.“