Read Свето Писмо: Стандардна Библија 2006 (со девтероканонски книги) Излез 28 Bible Online

Излез 28 - Свето Писмо: Стандардна Библија 2006 (со девтероканонски книги) bible

Излез 28

¹„А ти земи го кај себе Арон, братот твој, со синовите негови, за да Ми бидат свештеници: Арон, Надав, Авиу, Елеазар и Итамар, синови Аронови.

²И направи му свети одежди на Арон, братот твој, за чест и слава.

³И кажи им на сите надарени со ум, кои сум ги исполнил со дух на мудрост, да му направат на Арон одежди, за негово посветување, за да Ми биде свештеник.

⁴А ова се одеждите што треба да ги направат: наградник, ефод [5], наметка, везен хитон [6], кидар [7] и појас. Нека направат свети одежди за Арон, и за синовите негови, за да Ми бидат свештеници.

⁵Затоа нека земат злато и сина, пурпурна и црвена волна и чист лен.

⁶Па нека направат ефод од злато и од сина, пурпурна и црвена волна и од пресукан чист лен — уметничка изработка.

⁷На него два нарамника нека има, кои се врзуваат на двата краја, за да се држат заедно.

⁸И појасот на ефодот, што е одозгора, нека биде иста изработка: од злато, од сина, пурпурна и црвена волна и од пресукан лен.

⁹И земи два камена оникс, и изрежи ги на нив имињата на синовите Израелови:

¹⁰шест имиња нивни — на едниот камен, а другите шест имиња — на вториот камен, според редоследот на нивното раѓање;

¹¹со помош на каменорезец, како гравура врз печат, ќе ги изрежеш на тие два камена имињата на синовите Израелови.

¹²Тие два камена потоа стави ги на нарамниците од ефодот, како камења за спомен на синовите Израелови: и Арон ќе ги носи имињата на синовите на Израел пред Господ на обете рамења за нивни спомен.

¹³Направи и две копчиња од злато,

¹⁴потоа две веришки од чисто злато; направи ги како усукани врвци, па закачи ги плетените веришки за копчињата.

¹⁵И градник судиски направи — уметничка работа; направи го како по составот на ефодот: од злато, од пурпурна, сина и црвена волна и од пресукан лен направи го;

¹⁶четириаголен да биде, двоен, педа долг и педа широк;

¹⁷нареди по него во четири реда скапоцени камења. Во првиот ред: рубин, топаз и смарагд,

¹⁸во вториот ред: антракс, сафир и елмаз;

¹⁹во третиот ред: опал, ахат и аметист;

²⁰во четвртиот ред: хризолит, оникс и јаспис. Тие треба да бидат поставени во златни рамки.

²¹Тие камења со имињата на синовите Израелови треба да бидат дванаесет, според имињата нивни: нека бидат врежани како печат, со по едно име од бројот на дванаесетте племиња.

²²И на наградникот стави виени веришки, исплетени од чисто злато.

²³Направи и две златни алчиња за наградникот, и двете алчиња прицврсти ги за двата краја на наградникот,

²⁴па провлечи ги двете златни веришки низ двете алчиња за краевите од наградникот,

²⁵а другите два краја од двете веришки закачи ги за двете копчиња и стави ги на нарамниците од ефодот, од предната страна.

²⁶Направи и уште други две алчиња златни, па стави ги на другите два краја од наградникот, од внатрешната страна на ефодот;

²⁷а направи и две златни алчиња, и прицврсти ги за двата нарамника на ефодот, одоздола, од неговата предна страна, каде што се соединува, над појасот.

²⁸Потоа алчињата на наградникот нека се врзат за алчињата на ефодот со сина врвка плетена од волна, та да не се одделува наградникот од ефодот, туку да стои на појасот од ефодот,

²⁹А Арон ќе ги носи имињата на синовите Израелови преку наградникот судиски, над срцето свое, кога ќе влегува во светилиштето, за спомен пред Бога.

³⁰А во наградникот судиски стави ги урим и тумим; и тие ќе бидат над срцето Ароново, кога влегува пред Господ; а Арон секогаш ќе го носи над срцето свое судот на синовите Израелови пред Господ.

³¹Направи и наметка кон ефодот, целата сина;

³²одозгора во средината нека има прорез за главата; и нека биде работ на прорезот наоколу опшиен со ткаен ширит, како што се опшива отворот на оклоп, така што наметката да не се реси;

³³и по полите нејзини направи топченца од сина, пурпурна и црвена волна, а наоколу, меѓу нив, и златни ѕвончиња:

³⁴златно ѕвонче па топче, златно ѕвонче па топче по полите на наметката насекаде наоколу.

³⁵Неа ќе ја носи Арон, кога ќе служи, за да се слуша гласот од неа кога ќе влегува во светилиштето пред лицето на Господ, а и кога излегува, та да не умре.

³⁶А направи и плочка од чисто злато, и на неа изрежи како на печат ‚Светиња Господова‘,

³⁷и да ја врзеш со сина врвца за кидарот, така што да стои од предната страна на кидарот.

³⁸И ќе биде на челото Ароново, та Арон на себе да ги презема гревовите на приносите, што ги посветуваат синовите израелски, и на сите дарови, што му ги принесуваат тие; и така, таа нека биде секогаш на неговото чело, за да бидат тие секогаш примени од Господ.

³⁹Направи и хитон од лен, и кидар од лен; а појасот направи го везен.

⁴⁰И на синовите Аронови направи им хитони, направи и појаси, и превивки за главата направи им, за чест и слава.

⁴¹Во тоа облечи го Арон, братот твој, и синовите негови со него; помажи ги, исполни им ги рацете, и освети ги, за да ми бидат свештеници.

⁴²А направи им и долна облека од лен, да се покрие голотијата од телото нивно, од крстот до бедрата;

⁴³и да ги носи Арон, и синовите негови, кога влегуваат во скинијата, или кога пристапуваат кон жртвеникот за служба во светилиштето, за да не навлечат грев и не умрат. Тоа нека биде вечен закон за него и за потомството негово по него.“