Read Свето Писмо: Стандардна Библија 2006 (со девтероканонски книги) Излез 31 Bible Online

Излез 31 - Свето Писмо: Стандардна Библија 2006 (со девтероканонски книги) bible

Излез 31

¹И му рече Господ на Мојсеј, велејќи:

²„Ете, го определив по име Веселеил, син на Уриј, синот на Ор, од племето Јудино;

³и го исполнив со Духот Божји, со мудрост, разум, знаење и секаква умешност;

⁴да работи со злато, сребро и бакар;

⁵да реже камења, да прави дрвени изработки, за секакви потреби.

⁶И, ете, му го дадов за помошник Охолијав, синот на Ахисамах, од племето Даново; и на сите способни луѓе им дадов разум да се потрудат да направат сѐ како што ти заповедав:

⁷скинијата, и ковчегот на заветот, и чистилиштето над него, и сиот прибор во скинијата;

⁸и трпезата со сите нејзини принадлежности, и светилникот од чисто злато со сите делови негови, и кадилниот жртвеник;

⁹жртвеникот за жртви сепаленици со сиот негов прибор, и мијалникот и подножјето негово;

¹⁰и одеждите на Арон за служење и одеждите на синовите Аронови, со кои ќе ми свештенодејствуваат;

¹¹и маслото за помазание, и кадивото благопријатно за светилиштето — сѐ нека направат така, како што ти заповедав.“

¹²И пак му рече Господ на Мојсеј, велејќи:

¹³„Кажи им на синовите на Израел така: пазете ги саботите Мои, зашто тоа е знак меѓу Мене и вас од колено до колено, за да знаете дека Јас сум Господ, Кој ве осветува.

¹⁴Пазете ја саботата, бидејќи таа е света за вас: кој ќе ја оскверни, да се погуби. Секој, кој ќе врши некаква работа во тој ден, таа душа нека се истреби од народот свој.

¹⁵Шест дена нека се работи; а седмиот ден е сабота, ден за одмор, посветен на Господ: секој, кој ќе работи во саботен ден, нека се предаде на смрт.

¹⁶Затоа синовите израелски нека ги пазат саботите, празнувајќи ги во родовите свои како вечен завет.

¹⁷Тоа е знак меѓу Мене и синовите на Израел довека; зашто во шест дена ги создаде Господ небото и земјата, а во седмиот ден си отпочина и се одмори.“

¹⁸И кога Бог престана да зборува со Мојсеј на Планината Синајска, му ги даде двете плочи на заветот — камени плочи, напишани со прст Божји.