Read Свето Писмо: Стандардна Библија 2006 (со девтероканонски книги) Излез 36 Bible Online

Излез 36 - Свето Писмо: Стандардна Библија 2006 (со девтероканонски книги) bible

Излез 36

¹И започнаа да работат Веселеил и Охолијав и сите способни луѓе, на кои Господ им беше дал мудрост и знаење да разбираат и да работат секакви работи, потребни за светилиштето, сѐ како што беше заповедал Господ.

²И ги повика Мојсеј Веселеил и Охолијав и сите мудри луѓе, на кои Бог им дал разум во срцето, и сите, кои од срце сакаа да се зафатат за дела што треба да се свршат.

³И тие ги зедоа од Мојсеј сите дарови што ги беа принеле синовите израелски за потребите на светилиштето за да се работи. А тие ги примаа уште и принесуваните дарови од оние што носеа секое утро.

⁴Тогаш дојдоа сите вешти луѓе, што вршеа работи за светилиштето, секој според својата работа, кој каква што работел,

⁵па му рекоа на Мојсеј: „Народот принесува повеќе отколку што е потребно за да се направи, она што заповеда Господ.“

⁶И Мојсеј разгласи во таборот, велејќи: „Ни маж ни жена да не принесува ништо повеќе како дар за светилиштето.“ И народот престана да принесува,

⁷зашто имаше доста принесено за секакви работи што требаше да се направат, дури и преостануваше.

⁸Тогаш сите вешти луѓе, кои се обврзаа да ја направат скинијата, приготвија десет платништа од пресукан лен и од сина, пурпурна и црвена волна и на нив направија уметнички извезени херувими.

⁹Должината на секое платниште изнесуваше дваесет и осум лакти, а ширината четири лакти; сите платништа беа со иста мерка.

¹⁰И Веселеил ги состави петте платништа едно со друго, и другите пет платништа ги состави едно со друго.

¹¹И направи сини петлици по рабовите на едното платниште, каде што ќе се соединува со другото; такви направи тој и на работ од последното платниште, за да го соедини со другото.

¹²Педесет петлици направи на едното платниште, каде што се соединува со другото; петлиците беа една спрема друга.

¹³И направи педесет златни кукички и со кукичките состави едно платниште со друго. Така скинијата стана една целина.

¹⁴Потоа направи платништа од козина за покривање на скинијата; единаесет такви платништа направи:

¹⁵едно платниште беше долго триесет лакти, а широко четири лакти; една мерка беа сите единаесет платништа.

¹⁶Па ги состави петте платништа одделно, а шесте платништа одделно.

¹⁷И направи педесет петлици по работ од крајното платниште, каде што се соединува со другото, и педесет петлици направи по работ на другото платниште, за да се соединува со другото;

¹⁸а направи и педесет кукички од бакар, за да се состави покривот, та да стане целина.

¹⁹Потоа направи покрив за скинијата од овнешки кожи, црвени, а над неа друга — од сини кожи.

²⁰И направи штици за скинијата од дрвото шитим, што ќе стојат исправени;

²¹секоја штица од по десет лакти долга, а лакот и половина широка;

²²секоја штица имаше по два клина, еден спроти друг; така направи тој на секоја штица од скинијата.

²³А вакви штици за скинијата направи дваесет за јужната страна:

²⁴и направи четириесет подножја сребрени за под дваесетте штици, по две подножја под секоја штица за двата клина нејзини, и по две подножја под другата штица за двата нејзини клина.

²⁵И за другата страна на скинијата, спрема север, направи дваесет штици,

²⁶и четириесет сребрени подножја: две подножја под едната штица и две подножја под другата штица.

²⁷А за задната страна на скинијата, кон запад, направи шест диреци;

²⁸направи уште две штици за аглите на скинијата од задната страна;

²⁹тие беа составени одоздола и одозгора со една алка; така направи тој со обете страни на двата агла;

³⁰и така имаше осум штици и шеснаесет подножја сребрени, по две подножја под секоја штица.

³¹Потоа направи напречници од дрвото шитим: пет за штиците од едната страна на скинијата,

³²и пет напречници за штиците од другата страна на скинијата, и пет напречници за штиците од задната страна на скинијата.

³³А направи и внатрешна напречница што ќе иде преку средината на штиците од едниот до другиот крај;

³⁴диреците ги опкова со злато, а и алките, низ кои беа провлечени напречниците, ги направи од злато, па и напречниците ги опкова со злато.

³⁵Потоа направи завеса од сина, пурпурна и црвена волна и од пресукан лен и на неа направи херувими, уметнички извезени;

³⁶за неа направи и четири столба од дрвото шитим, и ги опкова со злато; и златни кукички за столбовите и им излеа четири подножја од сребро.

³⁷Направи потоа завеса за влезот во скинијата од сина, пурпурна и црвена волна и од пресукан лен, уметничка изработка,

³⁸и пет столбови за неа со кукичките нивни; врвовите на столбовите и нивните прстени ги обложи со злато, и направи пет подножја од бакар.