Read Свето Писмо: Стандардна Библија 2006 (со девтероканонски книги) Излез 39 Bible Online

Излез 39 - Свето Писмо: Стандардна Библија 2006 (со девтероканонски книги) bible

Излез 39

¹А од сина, пурпурна и црвена волна направија одежди за служба во светилиштето; му направија и свештени одежди на Арон, како што му беше заповедал Господ на Мојсеј.

²Направија ефод од злато, од сина, пурпурна и црвена волна и од пресукан лен;

³исковаа листови од злато, и исекоа нишки, за да ги вткаат вешто меѓу сините, пурпурните, црвените и во ленените нишки;

⁴му направија и нарамници што се врзуваат: тие се врзуваат со него на двата негови краја.

⁵И појасот на ефодот, од неговата горна страна, беше ист како и тој: од злато, од сина, пурпурна и црвена волна и од пресукан лен, како што му беше заповедал Господ на Мојсеј.

⁶И изрезаа и камења од оникс, и ги обрабија со злато, и ги впишаа на нив имињата на синовите Израелови, како што се прават печати;

⁷па ги ставија на нарамниците од ефодот, за спомен на синовите Израелови, како што му беше заповедал Господ на Мојсеј.

⁸Направија и наградник, вешто изработен, од иста материја како и ефодот: од злато, од сина, пурпурна и црвена волна и од пресукан лен;

⁹тој беше: четириаголен, двоен, педа долг, и педа широк; двоен го направија наградникот.

¹⁰И наредија на него четири реда камења: во првиот ред: рубин, топаз и смарагд;

¹¹во вториот ред: антракс, сафир и елмаз;

¹²во третиот ред: опал, ахат и аметист;

¹³во четвртиот ред: хризолит, оникс и јаспис; и тие беа опковани и обвиени во злато.

¹⁴Камењата беа според бројот на имињата на синовите Израелови: тие беа дванаесет, според бројот на нивните имиња, и на секој од нив беше изрежано како на печат по едно име, за дванаесетте племиња.

¹⁵И направија за наградникот веришки виени, плетени од чисто злато;

¹⁶направија и две копченца златни и две алчиња златни, и ги ставија двете алчиња на двата краја од наградникот;

¹⁷па ги закачија двете златни веришки за двете алчиња на краевите од наградникот,

¹⁸а другите два краја од двете веришки ги закачија за двете копченца и ги прицврстија на нарамниците од ефодот од предната страна.

¹⁹Направија уште две златни алчиња, и ги ставија на двата краја од наградникот, на внатрешниот раб, свртен спрема ефодот:

²⁰направија уште две златни алчиња, ги ставија на двата нарамника од ефодот, на неговиот преден крај одоздола, каде што се составува ефодот над појасот;

²¹и така го врзаа наградникот со алчињата негови за алчињата од ефодот со сина врвка, плетена, за да стои одозгора над појасот од ефодот и да не се одделува наградникот од ефодот, како што му беше заповедал Господ на Мојсеј.

²²А за ефодот направија и наметка, од сина ткаенина,

²³и прорез по средината на наметката, како отвор на оклоп, а околу прорезот ширит шиен, за да не се реси.

²⁴По полите на наметката одоздола направија топченца од сина, пурпурна и црвена волна и пресукан лен.

²⁵А направија и ѕвончиња од чисто злато, и ги закачија ѕвончињата на полите од наметката наоколу, меѓу топчињата:

²⁶ѕвонче и топченце, ѕвонче и топченце наоколу по полите на наметката, за служба, како што му беше заповедал Господ на Мојсеј.

²⁷Потоа направија хитони од ткаен лен за Арон и за синовите негови;

²⁸и кидар од лен и митра од лен, и долна облека од пресукан лен,

²⁹и појас од пресукан лен од сина, пурпурна и црвена волна — везена работа, како што му беше заповедал Господ на Мојсеј.

³⁰И направија плочка, дијадема на светоста, од чисто злато, и издлабија на неа писмо, како што се реже печат „Светиња Господова.“

³¹И врзаа за неа сина врвка, за да се врзува на кидарот одозгора, како што му беше заповедал Господ на Мојсеј.

³²И така се сврши целата работа околу скинијата. И направија синовите израелски сѐ како што му беше заповедал Господ на Мојсеј, така направија.

³³И ја донесоа кај Мојсеј скинијата, покривката и сиот нејзин прибор: кукичките, штиците, лостовите, столбовите и подножјата.

³⁴И покривката од црвени, овнешки кожи, и покривката од сини кожи и завесата за засолнување,

³⁵ковчегот на заветот со лостовите, и чистилиштето,

³⁶трпезата со сите нејзини принадлежности, и лебот за принос,

³⁷светилникот од чисто злато со неговите кандилца, кандилцата веќе наредени, и сиот прибор негов, и масло за светење,

³⁸златниот жртвеник, и маслото за помазание, кадиво мирисно, и завесата за влезот во скинијата,

³⁹жртвеникот од бакар и решетката од бакар за него, лостовите негови и сите принадлежности негови, мијалникот и подножјето негово,

⁴⁰завесите за дворот, столбовите за нив и подножјата нивни, и завесата за влезот во дворот, јажињата и колчињата, и сите работи потребни за служба во скинијата.

⁴¹Одеждите богослужбени за служење во светилиштето, свештените одежди за свештеникот Арон и одеждите за синовите негови, за свештеничка служба.

⁴²Како што му беше заповедал Господ на Мојсеј, така ги направија синовите на Израел сите тие работи.

⁴³И ги погледа Мојсеј сите тие работи, и ете, тие ги беа направиле: како што беше заповедал Господ, така ги беа направиле. И ги благослови Мојсеј.