Read Свето Писмо: Стандардна Библија 2006 (со девтероканонски книги) Излез 40 Bible Online

Излез 40 - Свето Писмо: Стандардна Библија 2006 (со девтероканонски книги) bible

Излез 40

¹И Господ му рече на Мојсеј велејќи:

²„Во првиот ден од првиот месец подигни ја скинијата на собранието,

³потоа постави го таму ковчегот на заветот и засолни го со завесата;

⁴внеси ја трпезата, и постави сѐ што треба да се намести на неа; внеси го и светилникот, а стави ги и кандилцата на него;

⁵постави го златниот жртвеник за кадење пред ковчегот на заветот; и закачи завеса пред влезот во скинијата.

⁶Постави го и жртвеникот за жртви сепаленици пред влезот во скинијата;

⁷стави го мијалникот меѓу скинијата и жртвеникот, и налеј вода во него;

⁸огради го дворот наоколу, и закачи ја завесата на вратата од дворот;

⁹па земи масло за помазание, и помажи ја скинијата и сѐ што има во неа: и освети ја неа и сите принадлежности нејзини, па ќе биде света.

¹⁰Помажи го и жртвеникот за жртви сепаленици и сиот прибор негов, па освети го жртвеникот, и жртвеникот ќе стане пресвет.

¹¹Помажи го и мијалникот, и подножјето негово, и освети го.

¹²Потоа доведи го пред влезот од скинијата Арон и синовите негови и измиј ги со вода;

¹³облечи го Арон во светите одежди и помажи го и освети го, за да Ми биде свештеник.

¹⁴Доведи ги и синовите негови, и облечи ги во хитони,

¹⁵и помажи ги, како што го помаза таткото нивни, за да Ми бидат свештеници; и помазанието нивно ќе ги освети за вечно свештенство во нивните поколенија.“

¹⁶И направи Мојсеј сѐ; како што му заповеда Господ, така направи.

¹⁷Во првиот месец од втората година, во првиот ден во месецот се подигна скинијата.

¹⁸Мојсеј ја подигна скинијата: ги постави подножјата нејзини, ги исправи штиците, ги постави напречниците, и ги исправи столбовите;

¹⁹па ги распна платништата над скинијата, а над нив го ставија покривот одозгора, како што му беше заповедал Господ на Мојсеј.

²⁰И, откако го зеде откровението, го стави во ковчегот, и стави ногалки под ковчегот, па го стави чистилиштето одозгора над ковчегот.

²¹Потоа го внесе ковчегот во скинијата, и ја закачи завесата, та го засолни ковчегот на заветот, како што му беше заповедал Господ на Мојсеј.

²²И ја постави трпезата во скинијата на собранието од северната страна на скинијата, пред завесата;

²³потоа постави на неа лебови за принос пред Господ, како што му беше заповедал Господ на Мојсеј.

²⁴Го намести светилникот во скинијата, спрема трпезата, од јужната страна на скинијата,

²⁵а ги постави и кандилцата пред Господ, како што му беше заповедал Господ на Мојсеј.

²⁶Го постави златниот жртвеник во скинијата, пред завесата,

²⁷и стави на него да гори мирисно кадиво, како што му беше заповедал Господ на Мојсеј.

²⁸Ја закачи завесата пред влезот во скинијата;

²⁹потоа го постави и жртвеникот за жртви сепаленици при влезот во скинијата, и принесе на него жртва сепаленица, и лебен принос, како што му беше заповедал Господ на Мојсеј.

³⁰Го намести и мијалникот меѓу скинијата и жртвеникот, и налеа во него вода за миење;

³¹и од него Мојсеј и Арон и синовите негови си ги миеја рацете свои и нозете свои;

³²а ги миеја кога влегуваа во скинијата на собранието и кога пристапуваа кон жртвеникот, како што му беше заповедал Господ на Мојсеј.

³³Го огради и дворот околу скинијата и жртвеникот, и ја стави завесата на влезната врата од дворот. Така ја доврши Мојсеј сета работа.

³⁴Тогаш облак ја покри скинијата на собранието и се исполни скинијата со слава Господова;

³⁵и Мојсеј не можеше да влезе во скинијата, зашто облакот го засенуваше, и славата Господова ја исполнуваше скинијата.

³⁶И секогаш кога се креваше облакот од скинијата, тогаш синовите израелски поаѓаа на пат;

³⁷а кога не се креваше облакот, тогаш ни тие не поаѓаа сѐ до денот, кога ќе се кренеше,

³⁸зашто облакот Господов стоеше над скинијата дење, а ноќе во облакот се појавуваше оган пред очите на целиот дом Израелов, при сите нивни патувања.