Read Свето Писмо: Стандардна Библија 2006 (со девтероканонски книги) Јов 11 Bible Online

Јов 11 - Свето Писмо: Стандардна Библија 2006 (со девтероканонски книги) bible

Јов 11

¹Потоа проговори Софар од Ноема и рече:

²„Зар на многу зборови не може да се даде одговор, и зар многузборливиот човек е прав?

³Твоето празнословие ќе ги натера ли луѓето да молчат, за да се потсмевнуваш ти, та да нема кој да те засрами?

⁴Ти рече: расудувањето ми е правилно, и јас сум чист во Твоите очи.

⁵О, да проговореше Бог, да ја отвореше устата Своја кон тебе

⁶и да ти ги откриеше тајните на мудроста дека тебе ти се паѓа двојно повеќе да понесеш! И така, знај дека Бог за тебе предаде на заборав некои од твоите беззаконија.

⁷Можеш ли во длабочините Божји да проникнеш? Можеш ли да го достигнеш совршенството на Седржителот?

⁸Тој е повисок од небесата, — што можеш да направиш? Подлабок е од пеколот, — што можеш да дознаеш?

⁹Подолга од земјата е мерката Негова и поширока од морето.

¹⁰Ако се нафрли и затвори некого во окови и го изведе на суд, кој ќе Му забрани?

¹¹Зашто Тој ги знае оние кои лажат и го гледа беззаконието; ќе го остави ли без да го разгледа?

¹²Но и суетниот човек се опаметува; дивото магаре на узда се покорува.

¹³Ако го насочиш срцето свое и ги подадеш рацете кон Него,

¹⁴ако порокот од раката своја го отфрлиш и не дозволиш беззаконие да престојува во твоите шатори,

¹⁵тогаш ќе го кренеш неизвалканото лице свое, ќе бидеш цврст и нема да се плашиш.

¹⁶Тогаш ќе ја заборавиш тагата: како за истечена вода ќе се сеќаваш на неа.

¹⁷Животот твој ќе стане како светол ден; како јасна зора темнината ќе светне.

¹⁸Во надежта своја ќе бидеш спокоен, ограден, ќе почиваш во мир.

¹⁹Ќе легнеш и не ќе има кој да те заплашува; мнозина ќе ти се умилкуваат.

²⁰А очите на беззакониците ќе згаснат, прибежиштето нивно ќе пропадне, а надежта нивна ќе исчезне.“