Read Свето Писмо: Стандардна Библија 2006 (со девтероканонски книги) Јов 12 Bible Online

Јов 12 - Свето Писмо: Стандардна Библија 2006 (со девтероканонски книги) bible

Јов 12

¹Пак одговори Јов и рече:

²„Само вие ли сте луѓе, и со вас ли ќе исчезне мудроста!?

³И јас знам да мислам како вас; и во ништо не сум подолен од вас; и кој не го знае истото тоа?

⁴За потсмев станав јас на пријателот свој, јас што Го повикував Бога, и Кој ми одговараше, — за потсмев е — праведниот и непорочниот човек.

⁵Презир заслужува несреќниот — такви се мислите на среќните, еве што се спрема за оние, чии нозе се сопнуваат.

⁶Спокојни се шаторите на крадците и безопасни на оние што Го гневат Бога, ним Бог им дава сѐ.

⁷Но, прашај го добитокот, и ќе те научи; запрашај ја небеската птица, и ќе ти објасни.

⁸Разговарај со Земјата и таа ќе те поучи, прашај ги рибите морски и тие ќе ти кажат.

⁹Кое од сите созданија не знае дека раката на Господ го создаде тоа?

¹⁰Во Неговата рака е душата на сѐ што е живо и духот на секоја човечка плот.

¹¹Нели увото ги разбира зборовите, и нели јазикот го распознава вкусот на храната?

¹²Кај старците има мудрост, а кај долговечните — разум.

¹³Но во Него има мудрост и сила, Негови се решението и разумот.

¹⁴Она што Тој ќе разурне, нема да се изгради: кого Тој ќе затвори, нема да се ослободи.

¹⁵Да ги запре водите, и сѐ ќе се исуши; да ги пушти, и земјата ќе ја разрушат.

¹⁶Во Него е силата и сета мудрост, пред Него е оној што е заблуден, и оној што воведува во заблуда.

¹⁷Тој ги приведува советниците во необмисленост и ги прави судиите безумни.

¹⁸Тој ги лишува царевите од власт и го врзува со јаже крстот нивни;

¹⁹на кнезовите им го одзема достоинството и силните ги кутнува;

²⁰им го одзема јазикот на говорниците и ги лишува од разум старците;

²¹ги покрива со срам славните и ја ослабнува силата на моќните:

²²ја открива темнината во длабините и ја вади на видело смртната сенка;

²³ги издигнува народите и ги истребува; ги распрснува и ги собира;

²⁴им го одзема умот на кнезовите земни и ги остава да лутаат во беспатна пустина:

²⁵со пипање одат тие по темнина, без светило скитаат како пијани.“