Read Свето Писмо: Стандардна Библија 2006 (со девтероканонски книги) Јов 15 Bible Online

Јов 15 - Свето Писмо: Стандардна Библија 2006 (со девтероканонски книги) bible

Јов 15

¹Проговори Елифаз од Теман и рече:

²„Ќе одговара ли мудриот со празни знаења и ќе го полни ли стомакот свој со врел ветар?

³Ќе се оправдува ли со бесполезна реч, и со зборови што немаат никаква сила?

⁴Ти пак го заборави стравот од Бога; пред Неговото лице ти трепет немаш.

⁵Твоите зборови вината Твоја ја покажуваат, се служиш со јазикот на лукавите.

⁶Тебе те обвинува устата твоја, а не јас; јазикот твој говори против тебе.

⁷Зар ти си првиот роден од човек и пред ридовите ли си создаден?

⁸Зарем си ги слушал тајните Божји и за себе мудрост си придобил?

⁹Што знаеш ти што ние не го знаеме? Што разбираш ти, а што го нема и во нас?

¹⁰Меѓу нас има и седокос, и старец, кои според деновите го надминуваат татко ти.

¹¹Зар се за тебе малку Божјите утехи? И Неговите благи зборови?

¹²Кон што те соблазнува срцето твое, кон што така гордо гледаш?

¹³Зошто го устремуваш против Бога духот свој и со устата своја изнесуваш такви зборови?

¹⁴Што е човекот, та да биде чист и родениот од жена да биде праведен?

¹⁵Ете, Тој и на светите Свои не се доверува, и небесата се нечисти во Неговите очи:

¹⁶толку повеќе е нечист и грешен човекот, кој го пие беззаконието како вода.

¹⁷Јас ќе ти говорам, слушај ме; ќе ти раскажам она што сум го видел,

¹⁸што го слушале мудрите и не го сокриле слушнатото од татковците свои,

¹⁹на кои им била дадена оваа земја, и меѓу кои туѓинец никогаш не стапнал.

²⁰Нечесниот се мачи себеси преку сите свои денови, годините му се одброени на потисникот;

²¹звук од ужас секогаш е во ушите негови; додека мирува, непријателот налетува на него.

²²Не се надева да се спаси од темнината; пред себеси гледа меч.

²³За парче леб скита постојано; знае дека е сосема близу денот на неговата смрт.

²⁴Нужда и теснотија го застрашуваат; навалуваат на него; како цар, готов за бој,

²⁵затоа што кревал рака против Бога и Му се противел на Седржителот,

²⁶се спуштал против Него со гордост, зад дебелите свои штитови;

²⁷затоа што го покрил лицето со маста своја и ги здебелил бедрата свои.

²⁸И тој се населува во разурнати градови, во куќи, каде што не се живее и кои набрзо ќе станат урнатини.

²⁹Тој нема да се збогати, и имотот негов нема да напредува; ниту поседот негов ќе се рашири по земјата.

³⁰Нема да избега од темнината; пламен ќе ги исуши ветките негови, во здивот на пламена уста ќе изчезне.

³¹Заблудениот нека не ѝ се доверува на суетата, затоа што суета ќе биде и платата негова.

³²Тој предвреме ќе умре, и ветките негови никогаш нема да се раззеленат.

³³Ќе го фрли тој како лоза неузреаното грозје свое, како маслинка ќе го истресе цветот свој.

³⁴Така ќе опустее домот на нечестивиот, и оган ќе ги голтне шаторите на поткупништвото.

³⁵Тој зачна зло и роди лага, во утробата своја подготвува измама.“