Read Свето Писмо: Стандардна Библија 2006 (со девтероканонски книги) Јов 16 Bible Online

Јов 16 - Свето Писмо: Стандардна Библија 2006 (со девтероканонски книги) bible

Јов 16

¹Одговори Јов и рече:

²„Сум се наслушал на такви работи; никакви утешители сте сите вие!

³Ќе имаат ли крај празните зборови? И што те поттикнало да ми говориш така?

⁴И јас можев да зборувам исто како вас, ако вашата душа беше на местото на мојата душа; би се противставувал со зборови против вас и би кимнувал со главата против вас;

⁵би ве поткрепувал со јазикот свој и со движењето на усните свои би ве утешувал.

⁶Ако говорам, скрбта моја не се сталожува; ако замолчам, зар ќе ме одмине?

⁷Но сега Ти ме изнемошти. Ти ми ја растури мојата челад.

⁸Ти ме покри со брчки, за сведоштво против мене; мојата истоштеност се крева против мене, в лице ме прекорува.

⁹Гневот Твој ме измачува и непријателствува против мене, ми чкрта со забите; непријателот ги впива очите во мене.

¹⁰Ја отвориле устата против мене; навредувајќи ме, ме удираат по образите; сите направиле заговор против мене.

¹¹Бог ме предаде на беззаконикот и ме предаде во рацете на нечестивите.

¹²Си бев спокоен, но Тој ме потресе; ме фати за вратот, ме затресе и ме постави за цел на Себеси.

¹³Ме опколија стрелците Негови; Тој ги раскинува моите внатрешнини, без да ме штеди, ја пролева на земјата жолчката моја,

¹⁴пробива во мене рана до рана, трча против мене како бесен борец.

¹⁵Вреќиште сошив на кожата моја и во прав ја турив главата своја.

¹⁶Лицето мое поцрвене од плачење, и на клепките имам смртна сенка,

¹⁷иако во рацете мои нема крадено, и молитвата моја секогаш била чиста.

¹⁸Земјо, не криј ја крвта моја; нека мојот повик насекаде се слушне.

¹⁹И сега, ете, на небото Сведок имам; Застапникот ми е во висините!

²⁰Се потсмеваат со мене пријателите мои, а очите ми солзат пред Бога.

²¹О, да можеше човек да се натпреварува со Бога, како синот човечки со својот ближен!

²²Зашто крајот на годините мои доаѓа; на пат без враќање треба да појдам.“