Read Свето Писмо: Стандардна Библија 2006 (со девтероканонски книги) Јов 19 Bible Online

Јов 19 - Свето Писмо: Стандардна Библија 2006 (со девтероканонски книги) bible

Јов 19

¹На тоа одговори Јов и рече:

²„До кога ќе ја мачите душата моја? До кога ќе ме измачувате со зборови?

³Ете, веќе десетпати ме посрамувате, и нели ви е срам да ме измачувате?

⁴Ако и навистина сум згрешил, грешката моја останува за мене.

⁵Ако, пак, сакате да се величате над мене и да ме прекорувате со мојот срам,

⁶знајте дека Бог ме собори и со мрежата Своја ме обвитка.

⁷Ете, јас викам: — ‚Неправда!‘ — и никој не слуша; врескам, и правда нема.

⁸Тој ми го загради патот, и не можам да минам; врз патеките мои спушти мрак.

⁹Ја соблече од мене славата моја и го симна венецот од мојата глава.

¹⁰Од сите страни ме сосипува, и јас умирам, и како дрво ја истргнува надежта моја.

¹¹Го разгори гневот Свој против мене и ме вброи меѓу непријателите Свои.

¹²Војските Негови дојдоа заедно, се упатија кон мене и се сместија околу шаторот мој.

¹³Браќата мои Тој ги оддалечи од мене; и оние што ме познаваат, бегаат од мене.

¹⁴Ме напуштија блиските мои и познатите ме заборавија.

¹⁵Дојденците во куќата моја и слугинките мои ме сметаат за туѓ; туѓинец станав во нивните очи.

¹⁶Го викам слугата свој, и тој не се одѕива; со устата своја треба да го молам.

¹⁷Здивот мој ѝ е одвратен на жената моја, и милувањата мои на родените синови мои.

¹⁸Дури и малите деца ме презираат; кога станувам, тие се подигруваат со мене.

¹⁹Од мене се гнасат најверните мои пријатели; и оние што ги сакав, — се свртеа против мене.

²⁰Веќе немам ништо освен кожата врз коските мои; во несреќата изгубив сѐ.

²¹Смилувајте се, смилувајте се над мене, пријатели мои, — зашто раката Божја се допре до мене.

²²Зошто ме гоните и вие како Бог, и со плотта моја не можете да се наситите!?

²³О, да беа зборовите мои напишани! Да беа ставени на книга!

²⁴Со железно длето и со олово, — да беа на вечни времиња врз камен издлабени!

²⁵Но јас знам: Заштитникот мој е жив; Тој го има последниот збор на оваа земја.

²⁶И кога ќе се распадне кожата моја, во телото мое ќе Го видам Бога.

²⁷Јас сам ќе Го видам; моите очи, не очите на друг, ќе Го видат Него. Срцето ми се топи во градите мои!

²⁸Вие требаше да кажете: — зошто го гониме! — Како да е коренот на злото најден во мене.

²⁹Плашете се од мечот, зашто мечот се одмаздува за неправда; и знајте дека има правда.“