Read Свето Писмо: Стандардна Библија 2006 (со девтероканонски книги) Јов 32 Bible Online

Јов 32 - Свето Писмо: Стандардна Библија 2006 (со девтероканонски книги) bible

Јов 32

¹Кога тие тројца мажи престанаа да му одговараат на Јов, бидејќи се сметаше за невин,

²се разгори гневот на Елијуј, син Варахиилов, од Буз, од Рамовиот род; се разгоре гневот негов против Јов, поради тоа што тој се правеше поправеден од Бога;

³а против тројцата негови пријатели се разгоре гневот негов затоа што тие не знаеја што да одговорат, а пак го обвинуваа Јов.

⁴Елијуј чекаше додека тие говореа со Јов, зашто по години беа постари од него.

⁵А кога Елијуј виде дека нема одговор во устата на тројцата мажи, гневот негов се разгоре.

⁶И одговори Елијуј, син Варахиилов, од Буз, и рече: „Јас сум млад по години, а вие сте старци; затоа јас се плашев и не се осмелував да ви го кажам моето мислење.

⁷Јас си велев: нека говорат дните и многулетието нека поучува во мудрост.

⁸Но има дух во човекот, и духот на Седржителот го вразумува.

⁹Не само многулетните се мудри, ниту само старците знаат што е право.

¹⁰Затоа велам: ислушајте ме, ќе ви го кажам и јас моето мислење.

¹¹Ете, чекав вие да се искажете, го слушав вашето расудување, додека вие говоревте.

¹²Внимателно ве следев, и никој од вас не го изобличи Јов и не одговори на зборовите негови.

¹³Немојте да речете: ‚ние наидовме на мудрост: Бог ќе го убеди, а човекот не може.‘

¹⁴Ако тој ги упатуваше зборовите свои кон мене, јас ќе му одговорев не со вашите зборови.

¹⁵Се исплашија, повеќе не говорат; не знаат што да кажат.

¹⁶Чекав, а тие пак не говореа, престанаа и повеќе не зборуваа.

¹⁷Јас ќе говорам за сѐ, ќе го кажам мислењето свое.

¹⁸Затоа што сум полн со зборови, и духот ме притиска однатре.

¹⁹Ете, утробата моја е како затворено вино: готова е да прсне како нови мевови.

²⁰Ќе позборувам, за да ми се олесни; ќе си ја отворам устата и ќе одговорам.

²¹Нема да гледам кој е кој и на никого нема да му ласкам,

²²зашто не умеам да ласкам: за миг Создателот мој би ме зел.“