Read Свето Писмо: Стандардна Библија 2006 (со девтероканонски книги) Јов 6 Bible Online

Јов 6 - Свето Писмо: Стандардна Библија 2006 (со девтероканонски книги) bible

Јов 6

¹Одговори Јов и рече:

²„О, да беа точно измерени маките мои, и заедно со нив да го беа ставиле на терезија страдањето мое!

³Тие навистина би биле потешки од морскиот песок! Затоа зборовите ми се жестоки.

⁴Стрелите на Седржителот се во моето тело; духот мој нивниот отров го пие; ужасите Божји се управија против мене.

⁵Рика ли диво магаре при трева? Мука ли бик над крмата своја?

⁶Се јаде ли блуткавото без сол и има ли вкус белката од јајцето?

⁷До она до кое душата моја не сакаше да се допре, тоа ми е сега храна во болеста.

⁸О, да се беше збиднала желбата моја, и Бог да го исполнеше очекувањето мое!

⁹О, да сакаше Бог да ме сотре, да ме удреше со раката Своја и да ме уништеше!

¹⁰Тоа би ми била вистинска утеха, иако горам од мојата безмилосна болест, бидејќи не се откажав од зборовите на Светиот.

¹¹Колку ми е силата, та да се надевам на себе самиот? И каков е крајот, та да го продолжувам животот мој?

¹²Тврда како камен ли е силата моја? И од бакар ли е телото мое?

¹³Има ли во мене помош за мене, има ли за мене некоја поткрепа?

¹⁴Кој одбива милост кон ближниот свој, ако тој не престанал да се бои од Севишниот Бог?

¹⁵Како поток ме напуштија браќата мои, како бујни потоци коритото свое.

¹⁶Како снег и мраз што се топат од топлина и не се познава што имало.

¹⁷Во сушно време тие намалуваат, а во време на жеги исчезнуваат од местата свои.

¹⁸Ја менуваат насоката на патиштата свои, навлегуваат во пустина и се губат;

¹⁹погледнуваат кон нив карваните темајски, им се надеваат патниците од Сева,

²⁰но остануваат измамени во својата надеж: одат таму и црвенеат од срам.

²¹Такви сте и вие сега кон мене: видовте стравотија и се исплашивте.

²²Ви реков ли: дајте ми, или подајте ми нешто од вашиот вишок;

²³избавете ме од раката душманска, откупете ме од раката на мачителите?

²⁴Научете ме, и јас ќе замолчам; покажете ми во што сум згрешил.

²⁵Колку се силни искрените зборови! Но што кажуваат вашите прекори?

²⁶Мислите ли зборовите мои да ги изобличите? Во ветар ги фрлате зборовите ваши!

²⁷Го напаѓате сиракот и му копате јама на пријателот свој.

²⁸Но, ве молам, погледнете ме: зборувам ли лага пред вашето лице?

²⁹Погледајте: има ли неправда? Погледајте — правдата е на моја страна.

³⁰Има ли во јазикот мој неправда? Зар грлото мое не може да го разликува лошото?“