Read Свето Писмо: Стандардна Библија 2006 (со девтероканонски книги) Псалми 105 Bible Online

Псалми 105 - Свето Писмо: Стандардна Библија 2006 (со девтероканонски книги) bible

Псалми 105

¹Славете Го Господа; повикувајте го Неговото име; разгласувајте ги меѓу народите делата Негови.

²Славете Го и пејте Му; кажувајте ги сите Негови чудеса.

³Фалете се со Неговото свето име: нека се весели срцето на оние, кои Го бараат Господа.

⁴Барајте Го Господа и утврдувајте се, барајте го секогаш лицето Негово.

⁵Спомнувајте ги чудесата Негови, што ги направи, чудесата Негови и судовите од устата Негова,

⁶вие, семе Авраамово, слуги Негови, синови Јаковови, избраници Негови.

⁷Тој е Господ, Бог наш; Неговите судови се по целата земја.

⁸Тој вечно го помни заветот Свој, зборот што го заповедал во илјада родови,

⁹што му го ветил на Авраам, и заклетвата Своја на Исак;

¹⁰и му го поставил тоа како закон на Јаков и како вечен завет на Израел,

¹¹велејќи: „Тебе ќе ти ја дадам Хананската земја во ваше наследство.“

¹²Тогаш тие беа уште малку на број, многу малку, и беа придојдени во неа,

¹³па одеа од народ во народ, од едно царство кон друг народ;

¹⁴никому не му дозволуваше Тој да ги угнетува и цареви за нив караше:

¹⁵„Не допирајте се до Моите помазани, на Моите пророци не правете им зло!“

¹⁶И пушти глад во таа земја и секој лебен клас го сотре.

¹⁷Испрати пред нив човек: како роб беше продаден Јосиф.

¹⁸Ги стегнаа во окови нозете негови, железо околу вратот негов,

¹⁹додека се исполни зборот негов: зборот Господов го потврди.

²⁰Царот прати по него, го одврзаа, кнезот над народите го ослободи.

²¹Го постави за домаќин над домот свој и управител над сиот имот свој,

²²за да ги поучува кнезовите според својата волја и старешините негови да ги учи на мудрост.

²³Тогаш дојде Израел во Египет, и Јаков се всели во Хамовата земја.

²⁴Го умножи Бог многу Својот народ и го направи посилен од непријателите негови.

²⁵Се преврте срцето нивно и тие го замразија народот Негов, и почнаа да им пакостат на слугите Негови.

²⁶Го испрати Мојсеј, слугата Свој, и Арон, кого го избра.

²⁷Тие ги покажаа меѓу нив Неговите знаци и чудесата Негови во Хамовата земја.

²⁸Испрати темнина и се смрачи, и тие не се спротивставија на зборот Негов.

²⁹Ја претвори водата нивна во крв и ја уништи рибата нивна.

³⁰Се исполни земјата нивна со жаби, дури и собите на царот нивен.

³¹Тој заповеда: и нападнаа рој муви и мушички по сите нивни предели.

³²Наместо дожд, испрати врз нив град, оган што ја гореше земјата нивна,

³³и ги уништи лозјата нивни и смоквите нивни, ги сотре сите дрвја во нивните предели.

³⁴Рече и нападнаа скакулци и гасеници безброј;

³⁵и ја изедоа сета трева по земјата нивна, ги испојадоа сите плодови на нивите нивни.

³⁶И го погуби секое првородено во земјата нивна, првините од сиот нивен труд.

³⁷Ги изведе Израелците со сребро и злато, и немаше болен во племињата нивни.

³⁸Се зарадува Египет поради нивното излегување, бидејќи го беше обзел страв од нив.

³⁹Тој им простре облак како покрив и оган, за да им свети ноќе.

⁴⁰Бараа, и Тој им прати потполошки и со леб небесен ги наситуваше.

⁴¹Расцепи камен и потекоа води, потекоа како река по безводната земја,

⁴²зашто се сети на Својот свет збор кон Авраам, Својот слуга.

⁴³Па го изведе Својот народ со радост, Своите избрани — со веселба,

⁴⁴и им даде незнабожечки земји, и така наследија плодови од други народи,

⁴⁵за да ги чуваат наредбите Негови и да ги исполнуваат законите Негови. Алилуја!