Read Свето Писмо: Стандардна Библија 2006 (со девтероканонски книги) Псалми 106 Bible Online

Псалми 106 - Свето Писмо: Стандардна Библија 2006 (со девтероканонски книги) bible

Псалми 106

¹Алилуја! Славете Го Господа, зашто е добар, зашто Неговата милост е вечна.

²Кој ќе ја искаже силата на Господ, кој ќе ја разгласи сета похвала Негова?

³Блажени се оние што се држат до правдата и вршат праведност во секое време.

⁴Сети се на мене, Господи, во благоволението Свое кон Твојот народ; помогни ми кога ќе ги спасуваш нив,

⁵за да ги видам во добрини Твоите избраници, за да се развеселам со веселбата на Твојот народ, за да се пофалам заедно со Твоето наследство.

⁶Згрешивме ние и татковците наши, правевме беззаконија, постапувавме нечестиво.

⁷Нашите татковци во Египет не ги ценеа Твоите чудеса, не ги помнеа многуте милости Твои и се побунија кога се приближија до Црвеното Море.

⁸Но Тој ги спаси заради името Свое, за да им ја покаже силата Своја.

⁹Му се закани на Црвеното Море, и тоа се исуши; и ги преведе по бездните како по пустина;

¹⁰и ги спаси од рацете на оние што ги намразија и ги избави од рацете на непријателите.

¹¹Водите ги покрија нивните непријатели; не остана ниеден од нив.

¹²И тие поверуваа на зборовите Негови и Му испеаја похвала.

¹³Но тие набргу ги заборавија делата Негови, не го дочекаа Неговото решение;

¹⁴се занесоа од похотливоста во пустината, па Го искушуваа Бога во безводната земја.

¹⁵Тој го исполни нивното барање, но прати и пораз за душите нивни.

¹⁶Му позавидоа на Мојсеј во логорот и на Арон, светецот Господов.

¹⁷Се отвори земјата, го голтна Датан и ја покри дружината на Авирон.

¹⁸И пламна оган врз нив, и пламенот ги изгори нечестивите.

¹⁹Направија теле на Хорив и му се поклонија на идолот.

²⁰Ја заменија својата слава со лик на теле, што јаде трева.

²¹Го заборавија Бога, својот Спасител, Кој изврши големи дела во Египет,

²²чудеса во Хамовата земја, страшни дела при Црвеното Море.

²³И рече дека ќе ги истреби, но Мојсеј, Неговиот избраник, се застапи за нив во пукнатината, за да ја одврати јароста Негова, та да не ги погуби.

²⁴Тие ја презреа саканата земја, не Му веруваа на зборот Негов;

²⁵и роптаа во шаторите свои, не го послушаа гласот Господов.

²⁶Тој крена рака и им се заколна дека ќе ги погуби во пустината,

²⁷ќе го расее нивното семе меѓу народите и дека ќе ги растури по земјите.

²⁸Тие се придружија кон Ваал-Пеор и јадеа жртви, принесувани на мртви,

²⁹Го дразнеа Бога со делата свои, и на нив падна погибел.

³⁰Но стана Пинеас, се зазеде и поморот престана.

³¹И тоа му се прими за праведност од род во род довека.

³²И Го разгневија Бога кај водите на Мерива, и Мојсеј настрада заради нив,

³³зашто тие го огорчија духот негов, и тој згреши со устата своја.

³⁴Не ги истребија народите, за кои им беше рекол Господ,

³⁵туку се смешаа со незнабошците и свикнаа на нивните дела;

³⁶им служеа за нивните идоли, кои им станаа замка,

³⁷и ги жртвуваа синовите свои и ќерките свои на злите духови;

³⁸и проливаа невина крв, крвта на синовите свои и на ќерките свои, што им ги жртвуваа на хананските идоли, па земјата се извалка од таа крв;

³⁹се осквернија со делата свои, блудствуваа со постапките свои.

⁴⁰Се разгоре гневот на Господ против Неговиот народ, и Му омрзна наследството Негово,

⁴¹па ги предаде во рацете на непријателите и завладеаја над нив оние што ги мразеа.

⁴²Непријателите нивни ги угнетуваа, и тие се покоруваа под нивната рака.

⁴³Многупати ги избавуваше, но тие беа бунтовни со своите намери, па беа понижени поради своите беззаконија.

⁴⁴Па сепак, Тој погледна на нивната потиштеност, кога ги слушаше нивните молби,

⁴⁵си спомна на Својот завет со нив, се сожали поради големата милост Своја;

⁴⁶па поттикна сожалување спрема нив кај оние што ги беа заробиле.

⁴⁷Спаси нѐ, Господи, Боже наш, и собери нѐ од незнабошците за да го славиме Твоето свето име, да се фалиме со Твојата слава!

⁴⁸Нека е благословен Господ, Бог Израелов, отсекогаш засекогаш! И сите луѓе нека велат: Амин! Амин! Алилуја.