Read Свето Писмо: Стандардна Библија 2006 (со девтероканонски книги) Псалми 140 Bible Online

Псалми 140 - Свето Писмо: Стандардна Библија 2006 (со девтероканонски книги) bible

Псалми 140

¹Спаси ме, Господи, од злобен човек и избави ме од насилници;

²тие смислија зло во срцето свое, секој ден зачнуваат војни;

³ги изострија јазиците свои како змија; под устите им е аспидин отров.

⁴Запази, ме, Господи, од рацете на нечестив човек. Избави ме од луѓе насилници, кои смислија да ми подметнат нога.

⁵Горделивите тајно поставија стапица, и распнаа примки од јажиња за мене; на патот ми поставија примка.

⁶Јас Му реков на Господ: Ти си Бог мој: слушни го, Господи, гласот на моето молење.

⁷Господи, Господи, сило на моето спасение! Ти, Кој во денот на битката ја засолни главата моја,

⁸не давај, Господи, да му се исполни желбата на нечестивиот; не давај да постигнат, што намислија за да не се возгордеат.

⁹Главата своја да не ја подигнат оние што ме опколија; нека падне врз нив злобата на нивната сопствена уста.

¹⁰Нека паднат врз нив жарени јаглења; да бидат фрлени во јама, па да не станат.

¹¹Клеветникот нема да се одржи на земјава; злото ќе го одвлече неправедниот човек во погибел.

¹²Знам дека Господ ќе покаже правда за угнетените и милост за сиромасите.

¹³Да, праведниците ќе го исповедаат името Твое, и непорочните ќе се населат пред лицето Твое.