Read Свето Писмо: Стандардна Библија 2006 (со девтероканонски книги) Псалми 145 Bible Online

Псалми 145 - Свето Писмо: Стандардна Библија 2006 (со девтероканонски книги) bible

Псалми 145

¹Ќе Те превознесувам, Боже мој, царе мој, и ќе го благословувам името Твое сега, секогаш и во сите векови.

²Секој ден ќе Те благословувам и ќе го фалам името Твое сега, секогаш и во сите векови.

³Велик е Господ и достоен за голема похвала и величието Негово нема крај.

⁴Од род во род ќе се фалат делата Твои и за силата Твоја ќе се прикажува.

⁵За велелепната слава на Твојата светост ќе зборуваат и за Твоите чудеса ќе известуваат.

⁶Ќе говорат и за силата на Твоите страшни дела, и ќе прикажуваат и за Твоето величие.

⁷Ќе ја воспеваат славата на Твојата изобилна добрина, и ќе се радуваат на Твојата праведност.

⁸Штедар и милостив е Господ, долготрпелив и многумилостив.

⁹Добар е Господ спрема сите, и Неговите милости се во сите Негови дела.

¹⁰Нека Те прославуваат, Господи, сите Твои дела, и нека Те благословуваат светиите Твои,

¹¹и нека ја проповедаат славата на Твоето царство, а да прикажуваат и за силата Твоја.

¹²За да им се кажува на синовите човечки, за Твојата сила и за велелепната слава на Твоето царство.

¹³Твоето царство е царство на сите векови, а владеењето Твое над сите поколенија; верен е Господ во сите Свои зборови и свет во сите Свои дела.

¹⁴Господ ги придржува сите што паѓаат и ги подига свитканите.

¹⁵Очите на сите се управени кон Тебе, и Ти им ја даваш нивната храна навреме;

¹⁶Ти ја отвораш раката Твоја и исполнуваш сѐ што е живо со сите негови потреби.

¹⁷Праведен е Господ во сите Свои патишта и свет во сите Свои дела.

¹⁸Близу е Господ до сите, кои Го повикуваат, до сите, кои вистински Го призиваат.

¹⁹Тој им ја исполнува желбата на оние, кои се бојат од Него, ги услишува молитвите нивни, и ги спасува.

²⁰Господ ги пази сите кои Го сакаат, а сите грешници ќе ги истреби.

²¹Устата моја ќе Му искаже похвала на Господ; секое тело ќе го благословува името свето, сега, секогаш и во сите векови.