Read Свето Писмо: Стандардна Библија 2006 (со девтероканонски книги) Псалми 19 Bible Online

Псалми 19 - Свето Писмо: Стандардна Библија 2006 (со девтероканонски книги) bible

Псалми 19

¹Небесата ја објавуваат Божјата слава, а за делата на рацете Негови известува сводот небесен.

²Ден на денот објавува, и ноќ на ноќта знаење открива.

³Нема јазик, ниту, пак говор, во кој не се слуша нивниот глас.

⁴Сепак, нивниот звук се разнесува по целата земја, а нивните зборови до краиштата на светот. На небото му постави шатор на сонцето, кое

⁵излегува како младоженец од брачното легло, се радува како силен јунак што ја прелетува патеката.

⁶Од крајот на небесата е излезот негов, и патувањето негово до другиот крај; ништо не е сокриено од топлината негова.

⁷Непорочен е законот Божји — душите ги укрепува; верно е откровението на Господ — ги учи неуките,

⁸и Господовите повелби се праведни — го веселат срцето; Господовата заповед зрачи светлина; ги просветлува очите.

⁹Страхопочитта кон Господ е чиста — пребива довека; судовите Господови се вистина — сите се праведни;

¹⁰поскапи се од злато и од скапоцени камења — послатки се од восочен мед.

¹¹Слугата Твој ги пази; а кој ги пази, голема награда добива.

¹²Кој може да ги согледа своите грешки? И од оние тајни гревови очисти ме,

¹³и од горделивост запази го слугата Твој, за да не овладее со мене. Тогаш јас ќе бидам непорочен и ќе бидам очистен од големите престапи.

¹⁴Зборовите на устата моја и помислите на срцето мое нека бидат благоугодни пред Тебе, Господи, Карпо моја и избавителе мој!