Read Свето Писмо: Стандардна Библија 2006 (со девтероканонски книги) Псалми 27 Bible Online

Псалми 27 - Свето Писмо: Стандардна Библија 2006 (со девтероканонски книги) bible

Псалми 27

¹Господ е моја светлина и мое спасение: од кого да се плашам? Господ е крепост на мојот живот, од кого ќе стравувам?

²Кога се приближија до мене злобни противници и непријатели за да го изедат телото мое, се сопнаа и паднаа.

³И полк да се крене против мене, нема да се исплаши срцето мое; дури и цела војска да се дигне против мене, и тогаш ќе бидам полн со доверба.

⁴Само за едно Го молам Господа, само тоа го сакам: да останам во домот Господов преку сите денови на животот мој, да ја гледам Господовата убавина и да се поучувам во Неговиот свет храм,

⁵зашто во злочест ден Тој би ме сокрил во Својата скинија, би ме сокрил под покривот на Своето живеалиште; би ме искачил на карпа.

⁶Тогаш главата моја ќе се издигне над непријателите што ме опкружуваат; и јас ќе принесам во скинијата Негова жртва поради радоста, па ќе пеам и ќе Го фалам Господа.

⁷Чуј го, Господи, гласот мој, бидејќи кон Тебе викам смилувај ми се и услиши ме.

⁸Срцето мое ми вели: „Барај го лицето Негово!“; и јас го барам лицето Твое, Господи.

⁹Не сокривај го од мене лицето Свое; не одбивај го во гневот слугата Твој. Биди мој помошник; не отфрлувај ме и не оставај ме, Боже, Спасителе мој!

¹⁰Ако татко ми и мајка ми ме остават, Господ ќе ме прибере.

¹¹Научи ме, Господи, на Твојот пат и води ме по рамна патека, поради непријателите мои;

¹²не предавај ме на своеволноста на непријателите, зашто останаа против мене лажни сведоци со насилство во нивните носници.

¹³Но јас верувам дека ќе ја видам Господовата добрина во земјата на живите.

¹⁴Надевај се во Господ, биди бодар; нека е цврсто срцето твое; надевај се во Господ!