Read Свето Писмо: Стандардна Библија 2006 (со девтероканонски книги) Псалми 51 Bible Online

Псалми 51 - Свето Писмо: Стандардна Библија 2006 (со девтероканонски книги) bible

Псалми 51

¹Помилуј ме, Боже, поради големата Твоја милост, и заради големата Твоја добрина избриши ги беззаконијата мои.

²Измиј ме темелно од моето беззаконие и очисти ме од мојот грев,

³зашто престапите мои ги знам и мојот грев е секогаш пред мене.

⁴Против Тебе, само против Тебе згрешив и пред Тебе зло извршив, така што Ти си праведен кога ќе пресудуваш и беспрекорен кога ќе судиш.

⁵Ете, грешен сум роден, грешник уште од кога ме зачна мајка ми.

⁶Ти ја сакаш вистината во срцето, и внатре во мене ме учиш на мудроста Твоја.

⁷Пороси ме со исоп, и ќе бидам чист; измиј ме и ќе бидам побел од снег.

⁸Дај ми да чујам радост и веселба, нека се зарадуваат коските што Ти ми ги здроби.

⁹Одврати го лицето Свое од гревовите мои и избриши ги сите мои беззаконија.

¹⁰Создај чисто срце во мене, Боже, и нов и прав дух стави во мене.

¹¹Не отфрлај ме од лицето Свое и Светиот Дух Твој не одземај Го од мене.

¹²Врати ми ја радоста на спасението од Тебе и благороден дух зацврсти во мене.

¹³Тогаш ќе ги научам престапниците да одат по Твоите патишта, и грешниците кон Тебе ќе се обраќаат.

¹⁴Ослободи ме од пролеаната крв, Боже, Боже на моето спасение, и јазикот мој ќе пее за Твоето избавување!

¹⁵Господи, отвори ја устата моја, и устата моја ќе ја објави похвалата Твоја;

¹⁶зашто, жртви не ти се мили, кога би ти принел сепаленици, Ти не би ги примил.

¹⁷Жртвата пред Бога е срушен дух; срце понизно и смирено Ти, Боже, не отфрлуваш.

¹⁸Господи, направи му добро на Сион, според благоволението Свое, обнови ги ѕидовите ерусалимски.

¹⁹Тогаш ќе Ти бидат угодни жртвите на правдата, вознесувањата и жртвите сепаленици; тогаш на Твојот олтар ќе принесуваат телци.