Read Свето Писмо: Стандардна Библија 2006 (со девтероканонски книги) Псалми 66 Bible Online

Псалми 66 - Свето Писмо: Стандардна Библија 2006 (со девтероканонски книги) bible

Псалми 66

¹Воскликни Му на Бога, Земјо цела!

²Воспејте го името Негово, воздајте Му слава и похвала!

³Кажете Му на Бога: колку се страшни делата Твои! Поради големината на силата Твоја, ќе Ти се покоруваат непријателите Твои.

⁴Целата земја Ти се покорува и Ти пее, Ти пее на Твоето име!

⁵Дојдете и видете ги делата Божји, колку е страшен во чудата Свои за синовите човечки.

⁶Тој го претвори морето во суво; преку река минаа со нозе; таму се зарадувавме во Него.

⁷Со Својата моќ Тој владее вечно; Неговите очи гледаат на народите за да не се кренат бунтовниците.

⁸Благословувајте Го, народи, нашиот Бог и искажете Му похвала гласно.

⁹Тој ѝ даде живот на душата наша и не дозволи да потклекнат нозете наши;

¹⁰Ти нѐ испита, Боже, нѐ очисти, како што среброто со оган се пречистува.

¹¹Ти нѐ воведе при примка, ни стави товар на нашите плеќи.

¹²Допушти луѓето да ни се качат на глава. Минавме низ оган и вода, но нѐ изведе да здивнеме.

¹³Ќе влезам во Твојот дом со сепаленица, ќе Ти ги исполнам моите завети,

¹⁴што ги изговорија усните мои и ги искажа устата моја кога бев во неволја.

¹⁵Мрсни сепаленици ќе Ти принесам Тебе, со кадило од овни, ќе Ти принесам Тебе и волови и кози.

¹⁶Дојдете и чујте вие сите кои се боите од Бога и ќе ви раскажам сѐ што направи Тој за душата моја.

¹⁷Повикав кон Него со устата моја и Го возвеличив со јазикот свој.

¹⁸Да мислев беззаконие во срцето мое, Господ немаше да ме услиши.

¹⁹Но ме услиши Господ, го чу гласот на молењето мое.

²⁰Нека е благословен Бог, Кој не ја отфрли молитвата моја и не ме остави без милоста Своја!