Read Свето Писмо: Стандардна Библија 2006 (со девтероканонски книги) Псалми 71 Bible Online

Псалми 71 - Свето Писмо: Стандардна Библија 2006 (со девтероканонски книги) bible

Псалми 71

¹Кај Тебе Господи, се засолнувам, не допуштај да бидам посрамен никогаш!

²Избави ме поради праведноста Своја и спаси ме; приклони го увото Свое кон мене и спаси ме.

³Биди ми карпа за мое прибежиште, изведи ме на место сигурно — зашто Ти си моја крепост и мое прибежиште.

⁴Боже мој, избави ме од рацете на грешникот, од рацете на престапникот и насилникот,

⁵зашто Ти си моја надеж, Господи, моја верба од младоста моја.

⁶За Тебе цврсто се држам од раѓањето мое; Ти си мој покровител од мајчината ми утроба; за Тебе вечно ќе пеам.

⁷За многумина бев како некое чудо, но Ти си мојот силен помошник.

⁸Полна ми е устата со похвала, и со песна ја величам славата Твоја; и цел ден да пеам за Твоето велелепие.

⁹Не отфрлај ме на старост, кога ќе почне силата моја да исчезнува, не напуштај ме,

¹⁰зашто непријателите мои зборуваат против мене; и оние, кои ја демнат душата моја, се договараат меѓу себе,

¹¹велејќи: „Го остави Бог; гонете го и фатете го, зашто нема кој да го избави.“

¹²Боже мој, не оддалечувај се од мене; Боже мој, побрзај ми на помош!

¹³Да се посрамат и да исчезнат оние што ја клеветат душата моја; да поцрвенат и се засрамат оние, што ми сакаат зло.

¹⁴Јас, пак, секогаш ќе се надевам во Тебе и ќе Те славам сѐ повеќе.

¹⁵Устата моја ќе разгласува за Твоите праведни дела, и секој ден за делата на спасението од Тебе, зашто не им го знам бројот.

¹⁶Ќе влезам славејќи ги моќните дела на Господ Бог; ќе ја величам Твојата праведност — само Твојата.

¹⁷Боже, Ти ме поучуваше од младоста моја, и јас сѐ досега ги објавувам чудесата Твои.

¹⁸И во староста, кога ќе обелам, Боже, не напуштај ме, за да ја објавувам мишката Твоја, силата Твоја и правдата Твоја на сегашниот род и на идниот,

¹⁹силата Твоја и правдата Твоја, Боже, досега дури до вишното небо, преку која изврши големи дела, Боже. Кој е сличен на Тебе?

²⁰Колку големи и тешки маки ми прати, но Ти пак ќе ме оживееш, и пак ќе ме изведеш од земните длабочини.

²¹Ќе ми го зголемиш достоинството и пак ќе ме утешиш.

²²И јас ќе ја славам на харфа Твојата верност, Боже мој; ќе Те воспевам на лира, Светецу Израелов!

²³Ќе се радува устата моја, кога ќе Ти пеам, и душата моја, која си ја избавил.

²⁴И јазикот мој секогаш ќе зборува за Твојата правда, кога ќе поцрвенеат и ќе се засрамат оние, кои ми пожелуваа зло.