Read Свето Писмо: Стандардна Библија 2006 (со девтероканонски книги) Псалми 73 Bible Online

Псалми 73 - Свето Писмо: Стандардна Библија 2006 (со девтероканонски книги) bible

Псалми 73

¹Колку е добар Бог кон Израел, кон оние што се со чисто срце!

²А нозете мои за малку не потклекнаа, за малку чекорите мои ќе станеа несигурни, —

³зашто им позавидев на беззакониците, гледајќи го напредокот на грешниците,

⁴зашто не страдаат, нивните тела се цврсти и јадри.

⁵Немаат маки како другите, човечки неволји не ги засегаат.

⁶Затоа горделивоста им е како веришка околу вратот, а насилството им е облека.

⁷Очите им се подуени од сало, а од срцата им се излеваат безумија.

⁸Се подбиваат и злобно зборуваат, се закануваат надмено со насилство.

⁹Ја креваат устата против небото, а јазикот нивен ја обиколува земјата.

¹⁰Затоа народот Мој по нив се залетува, и мана не им наоѓа.

¹¹И вели: „Како ќе дознае Бог, и има ли знаење во Севишниот?“

¹²Ете, такви се грешниците, секогаш спокојни, богатство напластуваат.

¹³И си реков: зар залудо го чував чисто срцето свое и во невиност ги миев рацете свои?

¹⁴И се изложував на непријатности секој ден и на срам секое утро?

¹⁵Но ако речев: ќе расудувам и јас така, — тогаш ќе го изневерев родот на Твоите синови.

¹⁶И сакав тоа да го разберам, но тоа беше тешко за мене,

¹⁷сѐ додека не влегов во Божјото светилиште и не го разбрав нивниот крај.

¹⁸Навистина, си ги поставил на лизгаво место, на пропаст ги соборуваш!

¹⁹Како пропаднаа, како ненадејно исчезнаа и загинаа однесени од ужасот!

²⁰Како што човек го презира сонот кога ќе се разбуди, така, Ти, Господи, ќе ги презреш нив, кога ќе се разбудат!

²¹Кога душата ми беше огорчена, кога се јадосував однатре,

²²безумен бев и не разбирав, како добиче бев пред Тебе.

²³Но јас сум секогаш со Тебе: Ти ми ја придржуваш десницата моја,

²⁴ме водиш со советот Свој и ќе ме примиш во Твојата слава.

²⁵Кого Го имам јас на небото освен Тебе? А кога сум со Тебе на земјата ништо друго не барам.

²⁶Може да изнемошти срцето мое и телото мое; но Бог е сила на срцето мое и наследството мое.

²⁷Зашто, ете, оние, што се оддалечуваат од Тебе, пропаѓаат; Ти го истребуваш секого, кој отстапува од Тебе.

²⁸А мене ми е добро да сум до Бога, на Господ ја полагам надежта моја, за да ги раскажувам сите дела Твои.