Read Свето Писмо: Стандардна Библија 2006 (со девтероканонски книги) Псалми 76 Bible Online

Псалми 76 - Свето Писмо: Стандардна Библија 2006 (со девтероканонски книги) bible

Псалми 76

¹Познат е Бог во Јудеја; големо е Неговото име во Израел.

²Во Шалем е Неговото место, а Неговото живеалиште — на Сион.

³Таму Тој ја порази силата на стрелите, штитот и мечот и војната.

⁴Посветол си од светлината, повеличествен од древните гори!

⁵Се збркаа сите што беа со храбро срце; заспаа и им папсаа рацете.

⁶Од Твојата закана, Боже Јаковов, се скаменија и коњаниците и коњите.

⁷Ти си страшен, и кој ќе опстане пред Тебе, кога ќе се крене Твојот гнев!?

⁸Од небесата се чу глас дека ќе судиш; Земјата се уплаши и занеме,

⁹кога Бог стана да суди, за да ги спаси сите угнетени по Земјата,

¹⁰зашто и преку човековиот бес Ти ќе се прославиш, а и остатокот од нив ќе Те прославува.

¹¹Заветувајте се на Господ, вашиот Бог, и исполнувајте ги заветите; сите, што сте околу Него, принесувајте дарови, на Страшниот,

¹²Кој ги скротува духовите на кнезовите, од Кој се плашат и земните цареви.