Read Свето Писмо: Стандардна Библија 2006 (со девтероканонски книги) Псалми 80 Bible Online

Псалми 80 - Свето Писмо: Стандардна Библија 2006 (со девтероканонски книги) bible

Псалми 80

¹Пастиру Израелов, послушај! Ти, Кој го водиш Јосиф како стадо, Кој седиш на херувимите, заблескај!

²Пред Ефрем, Венијамин и Манасија издигни ја силата Своја и дојди да нѐ спасиш.

³Боже, поврати нѐ; нека светне лицето Твое, и ние ќе се спасиме!

⁴Господи, Боже на силите, до кога ќе бидеш гневен на молитвата од слугите Твои?

⁵Ќе ги храниш ли со леб од солзи, и напојуваш со солзи изобилно?

⁶Нѐ направи показ за кавги меѓу нашите соседи, и нашите непријатели ни се смеат.

⁷Господи, Боже на силите, поврати нѐ! Нека светне лицето Твое, и ние ќе се спасиме!

⁸Ти ја пренесе од Египет лозата, ги изгони народите и ја посади;

⁹исчисти за неа место, и ги зацврсти корењата нејзини, и таа ја исполни земјата.

¹⁰Горите се покрија од сенката нејзина, и гранките ѝ се како кедрови моќни;

¹¹таа пушти гранки до морето и ластари до реката.

¹²Зошто ја сруши нејзината ограда, па да ја берат сите, што минуваат по патот?

¹³Горскиот вепар ја подгризува, и полската ѕверка ја јаде.

¹⁴Боже на силите! Сврти се, погледај од небесата и види го и посети го ова лозје;

¹⁵и утврди го она што го посади десницата Твоја; погледај и на синот, што си го одгледал за Себе.

¹⁶Тоа е со оган обгорено и раскопано; од страв пред Твоето лице нека пропаднат!

¹⁷Твојата десница нека биде над човекот на Твојата десница, синот, кого си го одгледал за Себе.

¹⁸А ние нема да отстапиме од Тебе; оживеј нѐ, и ние ќе го призиваме Твоето име.

¹⁹Господи, Боже на силите, поврати нѐ; нека свети лицето Твое, и ние ќе се спасиме!