Read Свето Писмо: Стандардна Библија 2006 (со девтероканонски книги) Псалми 84 Bible Online

Псалми 84 - Свето Писмо: Стандардна Библија 2006 (со девтероканонски книги) bible

Псалми 84

¹Колку се мили Твоите живеалишта, Господи на силите!

²Копнее душата моја, сакајќи да е во Господовите дворови; срцето мое и телото мое со радост се стремат кон живиот Бог.

³И птичката си наоѓа живеалиште, и ластовичката гнездо, каде што ќе ги положи пилињата свои, при олтарите Твои, Господи на силите, царе мој и Боже мој!

⁴Блажени се оние, кои живеат во домот Твој; тие постојано Те фалат.

⁵Блажен е оној човек, кој заштита бара кај Тебе и во чие срце се патиштата Твои.

⁶Преминувајќи ја Сушната Долина, тие ја претвораат во извори, и дожд ја покрива со вирови;

⁷минуваат од сила во сила, додека не Го видат Бога, на Сион.

⁸Господи, Боже на силите, услиши ја молитвата моја, послушај, Боже Јаковов!

⁹Боже, заштитнику наш, погледај и види го лицето на твојот помазаник!

¹⁰Зашто еден ден во Твоите дворови е подобар отколку — илјада дни надвор. Повеќе би сакал да стојам на прагот пред Божјиот дом, отколку да живеам во шаторите на нечестието.

¹¹Бидејќи Господ Бог е сонце и штит, Тој дава благодат и слава; Господ не ги лишува од блага оние, што одат непорочно.

¹²Господи на силите, блажен е оној човек, кој се надева во Тебе!