Read Свето Писмо: Стандардна Библија 2006 (со девтероканонски книги) Псалми 86 Bible Online

Псалми 86 - Свето Писмо: Стандардна Библија 2006 (со девтероканонски книги) bible

Псалми 86

¹Приклони го, Господи, увото Свое и услиши ја молитвата моја, зашто сум беден и сиромав.

²Зачувај ја душата моја, зашто сум посветен на Тебе; спаси го слугата Твој, Боже мој, кој се надева во Тебе.

³Помилуј ме, Господи, зашто кон Тебе викам секој ден.

⁴Развесели ја душата на Твојот слуга, зашто кон Тебе, Господи, ја издигам душата своја;

⁵зашто Ти, Господи, си добар, кроток и многумилостив кон сите, кои Те повикуваат.

⁶Чуј ја, Господи, мојата молитва и послушај го гласот на молбата моја.

⁷Во денот на мојата мака повикав кон Тебе, и Ти ме чу.

⁸Меѓу боговите нема таков каков што си Ти, Господи, и нема дела како Твоите.

⁹Сите народи што си ги создал Ти, ќе дојдат и ќе се поклонат пред Тебе, Господи, и ќе го прославуваат името Твое,

¹⁰зашто Ти си велик и правиш чудеса, — Ти си Бог единствен!

¹¹Упати ме, Господи, кон Твојот пат, и јас ќе одам во Твојата вистина; и дај ми непоколебливо срце, за да го почитувам името Твое.

¹²Ќе Те славам, Господи, Боже мој, од сѐ срце и вечно ќе го прославувам името Твое,

¹³зашто Твојата милост кон мене е голема: Ти ја спаси душата моја од адските длабини.

¹⁴Боже, законопрестапниците станаа против мене, и многуте насилници ја бараат душата моја: тие Те немаат Тебе пред себе.

¹⁵Но Ти, Боже, Кој си штедар и милостив, долготрпелив, многумилостив и верен,

¹⁶погледни на мене и помилуј ме; дај му ја Твојата сила на слугата Свој и спаси го синот на слугинката Твоја;

¹⁷покажи со мене чудо за добро, па да видат оние, што ме мразат, и да се засрамат, зашто Ти, Господи, ми помогна и ме утеши.